貴租可安「車」？

對很多人來講，油價是揸車的頭號開支，停車場租金只係屈居亞軍，但別小覷這位「阿二」，皆因近期走勢凌厲，搶佔很多車主的榜首。編者最近八八卦卦四圍Look，發現很多停車場不約而同張貼「4月起加租」告示，加幅最少都有一成，更甚者兩成以上，膨脹幅度都幾驚人。有朋友指，每月燃油開支二千二至二千四百元左右，但停車場租金飆升一成多至二千五百大元。捱貴租都算，服務質素與管理繼續不善，例如除了閘口，場內竟然沒有CCTV監察，只係到時到候派位仁兄或阿姐「抄牌」做紀錄，早前黑雨，出現有蓋停車場「落雨水浸」，雖然水深沒有浸到車底，但部車就由頭淋到落腳污糟邋遢，想走？究竟要涉水取車，還是等水退呢？如果打算蟬過別枝，行多幾步租隔籬街隔籬場的車位，原來都係得個諗字，皆因Waiting List排到冇得再排。月租車位加價，時租車位都走唔甩，可幸是很多商場只要消費滿指定金額，便可獲泊車優惠，總算慳回不少。今期《汽車世界》特別號亦推介慳字訣，包括Volkswagen Golf系列、柴油版Mazda6及高性能低油耗Audi S3 Sedan，還有Infiniti Q70L Hybrid以混能大馬力突破環保車框框，值得大家參考。