Google Trekker上身360度影吳哥窟

街景背包深入古蹟

街景服務大家可能用得多，原來要影唔同地方，所需嘅拍攝器材都有啲分別。以馬路為例，大多會用上Google Car，喺車頂加裝鏡頭組件，駕駛時便能影到全景相片，另有街景三輪車、手推車等作不同用途。但如果要喺吳哥窟呢類不能駕車或推車，兼有極多梯級嘅環境，Google Trekker街景背包便要出動！Trekker主要分為兩部分，頂部圓形位置係鏡頭組件，入面有15個鏡頭，可拍攝不同角度相片，畫質高達7,500萬像素，最終會合成360度全景相；而底部有個方形金屬箱，入面係擺硬碟、定位裝置同埋用到6至8小時嘅電池組件。

浮雕清晰可見

硬件咁足料，原來用法好直接，只要孭住佢行，鏡頭便會每2.5秒拍攝一次。別以為咁就好輕鬆，皆因Trekker重達18kg，好似孭住幾包米咁重。今次拍攝吳哥窟計劃，大部分古蹟都要靠Trekker進行，喺梯級行上行落之外，還要應付曬到暈嘅天氣，想影到靚景都要付出唔少汗水。據Google表示，吳哥窟街景服務合共拍攝咗100座古廟，影咗超過90,000個全景影像，難怪要用接近一年時間完成。雖然咁辛苦，但當各位睇吳哥窟街景時便會發現，除了外觀之外，連內裏裝潢、牆上浮雕都清晰可見，官方仲話香港嚟緊都會用Trekker進行街景拍攝，值得期待！

Google Car都嚟到吳哥窟做示範，據講車種會因應不同地區而改變。	Google Trekker大拆解 驟眼睇好似孭住個爬山背囊，但顏色就Colourful好多。	腰部有個袋仔擺放Android手機，可監控Trekker電量等狀況。

個人化Gallery分享

吳哥窟歷史悠久，對文化、藝術有深遠影響，所以Google除咗為吳哥窟炮製街景服務之外，仲將內容帶到Cultural Institute平台。它主要分為Art Project（藝術計劃）、World Wonders Project（世界奇觀）等部分，前者將全球著名博物館或藝術家嘅作品，以數碼形式收錄，透過Gigapixel技術拍攝嘅藝術品，圖片仲可以放大縮小，最正係睇Gigapixel相片唔使安裝其他程式，操作超流暢。

背脊有個方形箱，入面有硬碟、電池等組件。	機頂呢個球狀物體內藏15個鏡頭，乜嘢角度都影到。	現場花絮 Google Trekker極少喺公開場合展出，現場仲有得試玩，好受歡迎。

而今次吳哥窟拍攝則屬於World Wonders Project，用家除咗睇到街景，入面仲會收錄不同時期嘅吳哥窟相片和影片，想對古蹟有更深認識嘅人士必用。順帶一提，Cultural Institute備有「使用者藝廊」功能，用家可將自己鍾意嘅作品儲存並製成一個專屬Gallery，仲可Share畀其他用家添！

Google同當地政府合作，將吳哥窟東面「包起」，等各地傳媒了解街景製作過程。	吳哥窟嘅街景服務連內部景致、牆上浮雕都睇得一清二楚。	街景地圖支援指南針模式，畫面會因應裝置方向而轉換。

特派記者：林子聰　

鳴謝：Google