L Series III二千有找食KitKat

自從代號KitKat的Android 4.4發布後，好多用家都望穿秋水等廠商升級，皆因Google講明新系統佔用資源較少，連512MB RAM嘅手機都唔會Lag。其實想食KitKat一啲都唔難，入門機都玩得到！講緊嘅係LG新推出的L Series III系列，L90 Dual同L70兩機均定價$2,000有找，並預載最新Android 4.4系統，加上備有IPS靚芒、Qualcomm處理器等規格，稱得上近期抵玩之選。

L90 Dual售價：$1,998（左）、L70售價：$1,498

Android 4.4爽快

以往選購入門機，除咗規格比旗艦機弱之外，最慘係作業系統唔夠新，好多時仲用緊Android 4.1或4.2，感覺總係差啲。今次新機就夠晒誠意，出廠時已預載Android 4.4系統，小記試玩L90 Dual及L70時，雖然兩者分別採用入門級Snapdragon 400四核心及Snapdragon 200雙核心1.2GHz處理器，亦只配備1GB RAM，但操作時出奇地順暢，不僅換頁玩Apps夠爽，連開AppDrawer都冇Lag機。小記睇番兩機嘅「工作管理員」，原來新機喺一般情況下有接近450MB RAM可用，難怪操作咁爽快。

IPS屏幕亮麗

作為上年Optimus L II嘅後繼機，L Series III系列同樣玩靚芒，L90 Dual及L70分別用上4.7吋及4.5吋屏幕，最重要係選用IPS面板，顏色豐富之餘，亮度及可視角度都非常高，唔似一般平價機咁淡色，用嚟睇片和打機，顯示效果令人滿意。惟美中不足係兩機嘅屏幕解像度都唔高，分別只得960×540及800×400，近睇或放大字體時略嫌唔夠細緻，如果能升級到720p以上就Perfect喇！

L90 Dual採用2,540mAh電池，可隨時拆殼換電。

廠商為新機推出Quick Window保護套，可於蓋上窗口位睇到來電等資訊。售價：$348/各

廠商為新機推出Quick Window保護套，可於蓋上窗口位睇到來電等資訊。售價：$348/各

移植敲芒功能

近期LG新機興玩敲芒功能，好似G2有敲芒着機嘅Knock On、G Pro 2有敲芒解鎖嘅Knock Code，估唔到這兩大功能竟統統移植到L Series III。用家敲兩下芒便能開啟或關閉屏幕，跟着預設順序敲芒即可為屏幕解鎖。值得一提，L90 Dual支援雙卡雙待功能，機面右下方更特設雙卡按鍵，一按即可更換主卡，長按約2秒便能進入「雙智能卡」目錄，可進行SIM卡識別圖案等設定，外遊或公幹人士最啱用。