SH-02F 487ppi 瀛合潮流

香港人向來崇日，Gadgets要Made in Japan，時裝美食非東瀛不愛。若閣下是其中一員，剛由水路抵港的DoCoMo SH-02F就至啱你，事關佢內置My Magazine滑動雜誌功能，可隨時追蹤日本新聞及潮流資訊，配合487ppi高像素密度靚芒，哈日迷必捧。

運行Live UX介面，最多提供7版主頁。售價︰$4,780

滑動日式雜誌

與國產Android手機不同，日系機必玩自家介面，故SH-02F即使搭載Android 4.2系統，仍植入Live UX介面，提供7版首頁之餘，最大賣點是預載My Magazine功能，其用途跟HTC的BlinkFeed有點相似，讓用戶按喜好觀看即時日本新聞，包括政治、娛樂、時裝、美食及旅遊等，並以雜誌方式排列，加上圖多過字，即使小記不諳日語，依然會覺得樂趣無窮。廠商為方便用家瀏覽，特設滑動指令，只要以指頭於屏幕中間向上撥，便能翻閱各則消息，設計細心。

高密度靚芒

新聞資訊以外，另一賣點是靚芒，4.5吋IGZO屏幕有1,080p解像度唔算特別，奇就奇在佢嘅像素密度（Pixel Per Inch）竟高達487ppi，比441ppi嘅GALAXY S4仲要高，畫面細緻度更勝一籌！當然屏幕好唔好，不能單睇數字，小記試玩時，見它顯示文字銳利，黑位層次感強，唯一缺點是屏幕過光，令顏色有點假，幸好系統提供Natural、Dynamic等6大顯示模式，顏色濃淡任君選擇。

機背備有1,310萬像素鏡頭及LED補光燈，配套不俗。

microSD卡及SIM卡要拆蓋先換到，設計一般。

四核運算強勁

硬件方面，新機搭載Snapdragon 800四核處理器、2GB RAM及16GB內存，跑分和速度都跟LG G2等機王睇齊。一如其他日系機，機身亦符合IPX5/7防水要求，可於1米水深正常運作30分鐘，惟它的連接介面只以底蓋包裹，感覺不及防水膠邊穩陣。雖然屏幕細小，耗電量不高，但廠商加入了2,120mAh電池，小記拎出街玩咗成日都夠用，不過由於佢喺香港只行到3G，食唔到LTE頻譜，上網速度稍慢。