情人節殺到單身作戰3部曲

Speed Dating︰社交活動 愈趨普及

Speed Dating極速約會近年愈趨普及，好多人會當成普通的社交活動，而唔會將佢標籤化。Speed Dating FEVER總監黃新發（Frankie）指出，香港一年四季都有人玩Speed Dating，以Frankie搞的活動為例，平時周末約40~50人參加，大時大節可能達到100人，消費方面每人$200~$600不等，同平時出街食餐飯差唔多。「Speed Dating年齡定位較為年輕，如我哋嘅會員八成介乎25至35歲，試過有個40幾歲嘅會員問，點解大部分活動只限38歲以下人士參加，我哋只能講句唔好意思。而活動通常女參加者較多，一來女多男少是事實，二來女仔會較接受High Tea、Dinner等社交聯誼。」

輪流傾談 更換對手

去得Speed Dating，未必個個想搵另一半，Frankie指不少人是想透過活動識朋友，或者當是一個消遣娛樂。有一兩成會員成日問幾時有新活動，所以要不時諗計為Speed Dating加入新元素，如去年試過在沙灘搞活動，又或者借助主題公園或特色場地提升新鮮感。形式有變但玩法依舊，Speed Dating過程需輪住換對手，每次單獨傾談時間雖然只有幾分鐘，但現場會有MC帶起氣氛及話題。不過唔少人會犯錯，「如穿着不適合服裝、話題太過尖銳或過分拋書包等，都會嚇怕別人。」

Don'ts：盡量不要戴帽，一來予人感覺唔禮貌，而且未必每個人都Buy。	談吐 Dos：正常傾偈就可以，就算對象唔啱都唔好扮去洗手間或者玩手機。	Don'ts：好多女仔都問上比較尖銳嘅問題，如搵幾錢人工、有冇樓等，呢方面要戒。

跨國籍Speed Dating

一般Speed Dating活動都只有香港人玩，但今年Speed Dating FEVER、旅發局、機場管理局同海洋公園攜手舉辦的「愛聚香港」，將於明天起不分國籍咁玩足3天。其實去年Speed Dating FEVER喺情人節都搞過「海洋公園海陸空極速約會派對」，在海洋公園多個景點玩遊戲，Frankie話今年會用上園內新景點，設計成多個Tasks，每個回合會轉Partner。他表示今年288個名額一早爆滿，總共吸引超過2,000個香港、日本、韓國、台灣、菲律賓、泰國等參加者報名。

禮儀 Dos：問對方食唔食牛肉、食唔食辣，或幫大家點餐都會加分。最Work係問吓女仔凍唔凍。

Don'ts：適當時候拋幾句書包，講吓咖啡講吓酒會令人產生好感，但過分賣弄會招來反效果。

Speed Dating FEVER網址：www.sdfever.com.hk

Matching達人解說

Proposing達人解說

Matching︰更易Hit中終身伴侶

可能有人覺得Speed Dating存在不少「玩玩吓」人士，相對地Matching配對服務更易Hit中結婚對象。「約匯」（Date And Match）創辦人容會（Connie）表示，上來作配對嘅人士，男士由30歲到50幾歲都有，而女士則由27歲到40來歲，較有人生經驗而且學歷較高，心態上大多是搵另一半結婚。「我們會以人性化方法作配對，並非照單執藥搵對象，要了解雙方背後的經歷，才能更適當地配對。之前有一宗個案，男的要求一定要搵天主教徒，原來其前度是不肯跟他上教堂而分手，最後為他配對了另一半，去年9月還結了婚，女方雖然並無特定信仰，但肯跟他上教堂。」

配對也有旺淡季

要提升配對效率，其中一大元素是清楚自己目標。「如果目標清晰，男的通常見3個就OK，女的見4、5個就送得走。」但不少人比較難Match，第一是完全未拍過拖的人，完全唔知自己想要乜；其二是經過一場好深刻的關係，收埋自己幾年後才驚醒；第三是唔實際，唔知時間已經過去，今年35歲還想搵番24歲時的經歷。Connie遇過唔少棘手個案：「有個62歲伯伯想搵34歲以下的女士；有位外籍人士在外地有太太，但想在香港搵Second Wife；有位太太諗緊離婚，想預早搵定對象，只能說並唔係所有顧客都能幫到手。」大家可留意配對都有分旺、淡季，原來每年第4季到明年第1季會較旺，「年底聖誕之後，接住新年同情人節，通常有心配對嘅人早已出動，有心人大可度定時間表。」

「約匯」網址：www.dateandmatch.com.hk

Proposing︰求婚好橋 搵人幫手

拍緊拖嘅男女，通常對於求婚都冇乜經驗。「囍宴坊」創辦人林志華（Dex）指出，3年前推出求婚服務只是「膽博膽」，當時香港少有這類服務，甚至有人問「點解求婚都要假手於人？」Dex謂，求婚一生人一次，好多人都想情景一世難忘，所以會搵求婚公司製造感人場面，而且安排道具、Setup場地以至攝錄都方便好多。「相對早幾年，現時求婚Event層次提高咗好多，尤其是很多外國人將求婚片段放上網，有比較下自然有高要求。」Dex試過飛到台灣搞求婚Event，用上投影機將求婚句語投影到酒店外牆，結果一Take搞掂。

事前準備 感動場面

電影、電視中的求婚片段，總見到一大束氫氣球，Dex話這條橋早已過時。「到底女方應拿氫氣球、花抑或戒指呢？成功後點樣處置氫氣球？亦有不少人喺沙灘上點蠟燭砌圖案求婚，蠟燭喺海邊容易被風吹熄，燒完善後又麻煩，用上電蠟燭就冇咁嘅問題。」一般而言，求婚Event時間雖短，由半小時至2小時不等，但事前準備工夫一定要足，「如在酒店求婚的話，事前擺放蠟燭、堆毛公仔等可能要早一晚準備；在餐廳求婚的話，又要跟餐廳員工溝通好，預演有關路線。求婚橋段推陳出新，近年更興起旅行求婚，順便可以玩埋和影結婚相，想趁情人節求婚的人士可以考慮。」

「囍宴坊」網址：www.dfwedding.com.hk

撰文：布偉倫

攝影：林資凱（部分相片由受訪者提供）

模特兒：Christy、Cliff（Gaiety）

場地提供：Sogno Cafe+