OM-D E-M10 日光浪漫Light Painting

過幾日就到情人節，不少男士都絞盡腦汁炮製浪漫氣氛，有人送99支玫瑰、有人同愛侶自拍，甚至玩Light Painting寫出愛意。其實玩Light Painting唔使等夜晚，Olympus全新M4/3相機OM-D E-M10新增Live Composite模式，利用內置合成技術，喺日光日白一樣玩到光影塗鴉，隨時畫出浪漫回憶。

售價：$6,990（連14~42mm II R單鏡套裝）、$8,590（連14~42mm EZ及40~150mm雙鏡套裝）

合成環境光影

一般Light Painting都要喺「黑麻麻」環境進行，利用慢快門捕捉光影畫成的文字或圖案。而E-M10新增的Live Composite模式卻一反傳統，用家只需先按快門，拍攝一張正常曝光的環境相，再按多一次快門便可開始Light Painting，相機會把移動中的光源軌迹捕捉，第三次按快門便完成拍攝程序，之後相機會利用合成技術將環境和光源合併，就算曝光時間幾長，背景都唔會「爆光」。除了玩Light Painting外，新模式還可用來拍攝星軌，相機會自動幫你進行後製，跟愛侶由朝影到晚，玩完光影塗鴉再影星都冇問題。

三軸防震穩定

驟眼睇E-M10個樣跟同系E-M5極之相似，不過廠方指新機屬於下線產品，而非後繼機。其外形沿用復古設計，提供全黑和銀黑機身選擇，可惜唔支援防水滴防塵，而且內裏僅備有三軸防震，冇招牌五軸防震咁勁。但係E-M5嘅五軸防震主要針對影相使用，而E-M10嘅三軸防震無論影相或拍片都一樣用得到，加上機頂備有內置閃光燈，影人影景都清晰穩定。

設有Photo Story拼貼功能，可將幾張靚相合併。

在TruePic VII影像處理器下，連拍速度可達每秒8張。

Wi-Fi遙控拍攝

作為新一代相機，冇Wi-Fi又點成事？為簡化連接程序，新機提供QR Code配對功能，用家以智能手機一掃即可連線，再透過手機App《Olympus Image Share》，即可遙控拍攝和過相，甚至能為相片加工，等各位影完合照可即刻Share到社交網站晒幸福。雖然E-M10定位入門，但都有1,605萬像素CMOS及TruePic VII影像處理器，難怪高速連拍可做到每秒8張咁快，拍攝動態影像冇難度，另內置Photo Story拼貼功能及多款濾鏡特效，輕易炮製別樹一格的作品。

機背備有3吋翻揭式屏幕，方便以高低角度取景。	乍看之下E-M10（左）跟E-M5（右）有九成似，外形復古。	新機不但具備Hotshoe，還加入內置閃光燈。
以往E-M5的記憶卡槽位於機側，今次改為機底插卡。	設有雙操作轉盤，而且快門掣Size較大粒，用落更順手。