遙控電單車 老虎跳翻騰

模型車手跟住郁

遙控電單車最引人入勝嘅地方之一，係模型車上的人仔不僅是裝飾，同時備有連動機關，轉彎時人仔識跟住方向郁，似足真實賽車情況。香港遙控電單車會資深幹事Ivan表示：「日本KyoSho嘅1:8電單車模型，最特別係附有車手人仔，頭部跟臀部內藏支架，跟車身軸承相連，利用車身內置鋰電驅動前轆轉向時，軸承會令支架重心轉移，令車手人仔識得打側坐低屁股兼擰頭來平衡車身，驟眼睇仲以為係真人飆車，像真度十足。」

改完車才落場講完

「車手」基本原理，落場玩得未？Ivan話要砌架電單車出嚟先！「坊間遙控車多數係完成品，拎上手入電即玩。惟獨KyoSho出品嘅遙控電單車需事先組裝才能落場。」他表示，砌電單車離不開一般組裝模型技巧，如剪件修夾口、螺絲鑲車架、車殼黐膠水，最後以噴罐為車身上色及貼上車隊標誌等。「模型舖常見的塑膠電單車，大多作為Display擺設，如需要落場較勁，車身部分必須改用金屬，才能承受飆車時嘅損耗。例如換成鋁質波箱殼來強化耐用性，更換全車『啤令』及將彈弓換成油壓，以穩定車身。進階一點還需換埋直流無刷摩打、電子變速器及槍控系統，這樣才大功告成。」聽落好複雜，其實唔少遙控模型店舖都肯教你改裝，或者上相關車會網站都有教學。除咗遙控電單車模型約售$750起，以及槍形遙控器要成千蚊之外，其他配件一百幾十蚊有交易，如全車「啤令」都係$80左右，不算昂貴。

大型遙控車場設有看台，方便參加者從高處觀看賽道。

一般操車或比賽會帶備「士啤胎」，因應環境可隨時更換。

打8字練凹彎

經過一輪組裝後，電單車終於有姿勢有實際，一按槍控Trigger便可畀油，旁邊旋鈕控制前轆轉向，再利用電子屏幕調校加速幅度。Ivan建議初玩時唔好太心急：「電單車攞彎比四個轆嘅遙控車更精準，入過龍隨時失平衡翻車，故先要懂得拿捏距離感。建議先擬定圓周兩點練習打圈，操作自如後改練打8字，最後便可操凹彎。」遙控電單車除咗能夠處理刁鑽彎位外，甚至能玩到俗稱「老虎跳」嘅翻騰動作。「老虎跳箇中竅妙是於直線行駛時，突然畀油加速令前轆離地，便能瞬間做出後空翻動作。」

電單車無法自行站立，故起跑時需要以木架支撐。	槍控知多啲 按下槍控Trigger當油門，推上則是減速煞車。	面板按鍵能調校加速及煞車幅度，屏幕會有數據顯示。

2014第十屆同樂日

日期：2014年3月2日

花式一覽 老虎跳 直線行駛時，突然畀油加速令前轆仰地作後空翻。	高速劈彎 入彎前走外檔線位，之後「拖煞」進入內檔，壓低車身。	人仔車手的頭部與臀部內藏支架，跟車身軸承相連。

時間：9:00am~6:00pm

地點：ACO Racing Track遙控車場

費用：$180（會員）、$250（非會員）

網址：www.rcmchk.com

場地推介

想落街玩遙控電單車？雖然康文署開放轄下指定康樂場地供市民玩車，但要數較具規模嘅遙控車場，就只有天水圍公園、灣仔告士打道及佐敦谷公園。由於場地屬公眾開放，Ivan表示搞賽事比較困難，所以發燒友大多會前往位於粉嶺坪輋恐龍坑村私人車場ACO Racing Track，嚟緊3月2日仲舉辦一年一度嘅同樂日，大家有興趣不妨瀏覽車會網頁。

ACO Racing Track為私人車場，鋪設柏油路面的大型賽區，提供充電站、工作室等。

地址：粉嶺坪輋恐龍坑村

費用：$70/日起

查詢電話：2659 9638

佐敦谷公園模型車場為公共場地，設有B場室內平地賽道及A場附看台的大型賽道。

地址：觀塘新清水灣道71號

費用：免費

查詢電話：2342 2241

撰文：廖俊斌

部分攝影：胡振文

模特兒：Alia（Reborn Production）