愛侶Camping自製湯圓營元宵

露營活動 裝備全包

元宵節Camping數星星咁窩心，當然唔係小記諗出嚟，其實活動由專搞露營嘅「綠趣坊」舉辦，負責人Mac表示：「一般露營大家就玩得多，今次我哋趁元宵佳節，加番啲Sweet Sweet元素，務求讓各位過一個難忘之夜！」話明係Camping活動，當然要有足夠裝備，主辦單位除了會為參加者預備主要露營裝備，包括背囊、營幕、地蓆、煮食爐、水袋等，連簡單早午晚餐食材如通粉、蔬菜等都有，如果想豐富啲仲可自備食物添！不過各位當日帶齊衣物及緊急用品已基本搞掂，唔使為裝備撲餐懵。

西貢灣仔 大片草原

今次營地選址喺西貢灣仔半島，於黃石碼頭搭街渡可直達。其實這裏分為南、西兩大營地，前者有一個臨海草地，鍾意吹海風嘅露營發燒友會揀呢度落腳；後者則位處山上，望唔到海，但有一大片草原，空間大啲加上人煙稀少。今次便選擇咗西營地，乘船抵達後行上山約10分鐘即達，情侶拖住手傾吓偈，話咁快就到。西營地約可容納20個營，放眼所見，草地有成個標準足球場咁大，有少少外國Feel！

情侶可一齊紮營，粗重工夫當然由男士代勞。	西、南營地分別備有浴室同洗手間，沖涼、洗爐具都好方便。	大片草地環境開揚，兩人DIY風箏後起鳶都幾易。

二人協力 DIY風箏

到達營地之後，Mac會即場教大家點樣紮好個營，睇完示範後男男女女便可各自行動，一齊拉幕、落營釘、鋪地蓆，同心協力不知幾溫馨。整好個營就到活動時間，喺咁空曠嘅環境下，最啱就係放風箏，不過大家唔使預早買風箏，皆因Mac已預備好材料教你DIY，當中包括竹枝、棉線、塑膠袋、魚絲。不過要整骨架一啲都唔易，度位要準確，穿線要細心，整完之後仲可為風箏粉飾一番，喺風箏寫下甜蜜語句，見到又點會唔冧呢？

綠趣坊負責人Mac話，今年為各位炮製不一樣的元宵。	製作風箏材料簡單，不過度位穿線要畀啲耐性。	煮出嚟嘅紅白湯圓幾靚，一人一啖夠晒Sweet。

美味湯圓 溫馨賞月

湯圓寓意團圓及圓滿幸福，元宵當日梗係要應吓節啦。Mac會教大家落手落腳搓麵糰、落餡料，再加黃糖、薑片等製作湯圓，過程簡單；拎住碗熱辣辣嘅湯圓，你一啖時我一啖，簡直甜入心。食完糖水原來仲有嘢玩，皆因元宵當日正好係月圓之夜，而灣仔營地冇高樓大廈遮擋，抬頭一望睇到圓圓嘅月光，仲可以順道數星星，鍾意兩個人靜靜睇又得，擺定腳架影吓星空亦得，浪漫滿分。

放大圖片	附近冇乜光害，仲撞正月圓之夜，最啱影相。（設計圖片）	灣仔西營地環境空曠。

灣仔營地點樣去？

灣仔營地位於西貢，前往方法有兩個，一係由黃石碼頭乘搭渡輪或街渡，船程約10分鐘。又或者從西貢碼頭乘搭小巴往海下灣，再步行約半小時。

綵燈會 好節目	東港城 繁花裝飾	海港城 500花燈鋪天

活動詳情

日期：2月14至15日（2月12日截止報名）

費用：$288/位（成人）$268/位（12歲以下小童）

查詢電話：6446 9496

網址：www.naturefun.net

同場加映

唔想去郊外慶祝元宵的話，其實市區都有不少好去處，有傳統嘅綵燈會，有商場嘅靚靚布置，同情人一齊去逛吓都唔錯。

綵燈會 好節目

元宵節傳統會有大型綵燈晚會，猜燈謎、睇表演，活動多多。想感受一下熱鬧氣氛，就一定要Mark實2月14日。康文署呢日會喺各區舉辦元宵綵燈會，當中以文化中心露天廣場舉行嘅最具規模，有綵燈展覽、民族歌舞、傳統舞台技藝，大家仲可以玩遊戲攤位，熱熱鬧鬧過元宵！

日期：2014年2月14日

地點：香港文化中心露天廣場

東港城 繁花裝飾

唔少男士喺情人節會送花畀另一半，如果愛人都鍾意花的話，咁就要帶佢嚟東港城，皆因商場用上8萬朵新鮮蘭花及手工絲花打造3,000呎御花園，除咗有以中國七仙女為題材嘅「花仙之境」、用白蘭打造嘅「甜蜜天鵝湖」外，另有用上1,314朵花製成的拱門「心意福門」，同愛人合照就最好不過。

日期：由即日起至2月16日

地點：將軍澳東港城

海港城 500花燈鋪天

花燈係元宵節嘅傳統象徵，海港城今年將超過500個「花燈」裝飾，布置於正門及露天廣場，令現場環境充滿元宵節甜蜜感覺。另外，正門入口設計成一個高20呎的心形拱門，留影必到！

日期：由即日起

地點：尖沙咀海港城

撰文：林子聰

部分攝影：郭凱敏

模特兒：Miki、Long