大年初二，拜完年仲未諗到夜晚有乜做？未Plan好都唔緊要，皆因今晚8:00維港上空將上演「2014年農曆新年煙花匯演」，一於帶齊「架生」去維港兩岸影煙花啦！唔知點影先至靚？今次請來旅遊攝影達人Richard Lau，教大家影煙花貼士，大家袋定幾招傍身，拍攝璀璨煙花自然手到拿來。
影煙花有別於其他拍攝主題，以高速快門未必影到最靚嘅煙花，反而長時間曝光才能捕捉整個過程，Richard指出：「影煙花時相機應設定為最低感光度，而光圈宜收細至F8~F22，最重要係快門速度約3~10秒。如果想兩個甚至多個煙花於同一畫面出現，便應該利用B快門，配搭俗稱『黑卡』的不反光黑色卡紙，待一個煙花放完後以『黑卡』遮住，第二個煙花升起時再拎開曝光，咁就可影到晒不同款式的煙花，同時避免曝光過度問題。想簡單的話，其實唔少相機都有煙花模式，影出嚟嘅效果都唔錯。」
單講拍攝技巧係唔夠嘅，仲要有相應器材配合，例如要帶備穩陣嘅腳架，同時要確保影相時相機完全唔郁，有時需要快門線或無線裝置輔助。他表示：「現時不少相機都擁有Wi-Fi功能，就算唔記得帶快門線，都可利用手機遙控相機影煙花。」此外，唔想煙花的畫面千篇一律，就要準備長短鏡頭，隨時影到意外驚喜。「長鏡頭用來影煙花特寫，拍攝中間位置的煙花比較有利；而廣角鏡頭就用嚟影大環境，同時影晒中間和高空位置的煙花，不過煙花爆發嘅位置好難預測，所以經常要後期Crop畫面。」
今年煙花匯演歷時23分鐘，之不過唔係任何時間都是拍攝的最佳時間，原來開頭幾分鐘才是關鍵，唔好諗住用嚟測光咁浪費，Richard解釋：「假如現場唔夠大風，便好難吹散煙花遺留下來的煙霧，之後影嘅煙花相便會矇查查，所以要好好把握煙花發放頭5至8分鐘。」就算有風都唔一定影得好，因為一旦企錯位，就會食晒煙花嘅煙霧，影出來張相好似有層霧咁樣。「例如冬天大多數吹東北風，應該喺逆風的尖沙咀影番過去，咁先影得清楚，所以應該要Check住天文台的風向預報和最新消息。」
開啟相機B快門再配合黑卡，便能夠在畫面展現出多款煙花，同時避免曝光過度。
一般情況下，使用3~8秒快門作長曝，便能夠捕捉到煙花發放的過程，拉出亮麗的光影。
使用長焦距鏡頭能特寫中間位置的煙花，有需要時還可以裁剪畫面。
廣角鏡頭用於拍攝整個環境，影所有煙花都萬無一失，並可以對岸建築物作背景。
今晚的煙花匯演將會有8幕煙花於維多利亞港上空發放，全長23分鐘，其實幕幕都咁精彩，不過當中有幾幕值得推介，千祈唔好錯過。
由一連串「粉紅小花」及 「千個春雷」為煙花匯演揭開序幕，配以《Wonderland》作為背景音樂，加上「桃花」、「紅唇」在空中綻放，還有「紅蝴蝶」和「金蝴蝶」隨後翩翩起舞，代表迎春的喜悅。
新年當然要有大吉大利、恭喜發財等祝福語，所以煙花在空中發放出密集的「吉」字、「紅色的8字」及「金元寶」，全部都是寓意祝福和喜慶的標誌，而且背景音樂採用《祝福你》，相當貼題。
影煙花又怎能缺少相機，今次請來DC Fever主腦之一Jeffrey，推薦幾部相機畀大家，當中包括單反、無反和DC 3種不同類別。
短評：「EOS 6D是輕巧細小的全片幅DSLR，長時間曝光亦不怕有過量雜訊，而且內置Wi-Fi功能，方便將相片傳送至手機分享。」
售價：$13,980（淨機身）、$19,580（連24~105mm F4鏡頭）、$21,640（連24~70mm F4鏡頭）（a）
短評：「全片幅無反相機α7R，影像質素跟單反不相伯仲，可配合電子快門線及B快門作長時間曝光拍攝煙花。」
售價：$16,990（淨機身）（b）
短評：「X20是配備2/3吋大型CMOS之高級DC，可利用長達30秒的曝光時間來拍攝煙花，同時可另購機械快門線。」
售價：$4,880（c）
查詢電話：（a）3191 2333、（b）2345 2966、（c）2406 3225
撰文：黎子豪（部分相片由受訪者提供）