財源廣進納財風水陣
大年初二同大家見面，恭祝大家馬年財源廣進、金銀滿屋！究竟有乜嘢辦法做到財源廣進呢？今次就請嚟梅花易數玄學家常歡講解唔同生肖流年財運，而師傅表示馬年為甲午年，由於天干屬木（甲為陽木）、地支屬火（午為陽火）而納音則屬金（海中沙），對十二生肖嘅財運將帶嚟唔同嘅影響，故此佢會為大家帶嚟催財貼士同點樣擺番個催財風水陣，等大家今年可以廣進財源。
十二生肖馬年財運：馬
馬年出生嘅朋友都 知道今年係「犯太歲」，好多事情都要小心而行。師傅表示肖馬嘅朋友地支午火，正好同太歲嘅地支午火一樣，正所謂午午自刑，加上又犯本命年，將會對情緒帶嚟嚴重困擾，對於打工仔嚟講好多事都要煩心，而做生意嘅朋友則承受極大精神壓力，故此要喺心理上做好準備。不過屬馬嘅朋友又唔使太過擔心，皆因今年有吉星「貴人」臨照，可以化解部分災厄，財運自然冇有怕！
催財飾物：紅瑪瑙、紅方解石
羊
羊年出生嘅朋友今年運氣相當好，皆因屬羊嘅朋友地支未土，同太歲午火形成「六合」受生之勢，單係呢點已說明大家今年財運暢旺兼事事順利啦！咁仲不特止，屬羊朋友今年命宮中有兩顆「貴人」星臨照，一顆已經相當唔錯，家陣仲有兩顆喺度，不但令運勢亨通，工作、生意同投資、博彩等都可以從中獲利同馬到功成。此外，「六合」雖非正桃花星，但亦有和合嘅意思，對拍緊拖嘅羊男羊女嚟講絕對係個好消息。
催財飾物：黃鐵礦、茶水晶
猴
猴年出生嘅朋友地支為申金，正好被馬年地支午火所剋，相剋者即為受到壓迫嘅意思。本嚟咁就已代表每事總會被無形嘅力量所壓制，加上今年命宮出現「天狗」同「喪門」兩顆凶星，表示大家各方面將會受到種種壓迫。打工仔容易出現有志不能展開、有事不能辦嘅情況，做生意嘅人則會經常遇到唔順利嘅事，因此不論工作定係投資，都宜以小心為上，更何況係投注博彩更應可免則免，最多嚟個小賭宜情就好。
催財飾物：白水晶、白瑪瑙
雞
雞年出生嘅朋友地支為酉金，正正被太歲地支午火所剋，雖然形成相剋之勢，但係大家卻唔使過於擔心。事關師傅表示幸好有吉星「天德」同「福星」臨照，兩者不但可化解大部分負面嘅運勢，同時可以對正財及偏財帶嚟幫助，不論係想從正財工作、投資上有得着，定係想搵到橫財都得。此外，命宮中由於亦有吉星「紅鸞」臨照關係，正所謂紅鸞星動，單身者大利姻緣，而拍緊拖嘅男女亦有機會拉埋天窗。
催財飾物：金髮晶、銀髮晶
狗
狗年出生嘅朋友地支為戌土，同太歲地支午火成為「三合」，據師傅講「三合」有助人際關係，對打工仔嚟講往往得到貴人幫助，大有機會升職加人工，而對做生意嘅人嚟講則事事順境，尤其係對計劃創業嘅朋友更係順順利利兼財運亨通！不過屬狗嘅朋友則要留意，今年命宮中出現凶星「白虎」，佢將會對健康帶嚟負面影響，甚至會帶嚟血光之災，因此大家要小心身體同安全，自然可以達致一帆風順、財運暢順！
催財飾物：黃虎眼石、黃玉
豬
豬年出生嘅朋友地支為亥水，正好剋制太歲地支午火，加上命宮中有「紫微」同「龍德」兩顆吉星臨照，令到運勢大好兼每事順利，不僅對財運大有幫忙，從投資、搞生意同想有新嘅發展都具有利好嘅作用，當然偏財運亦相當唔錯！相對往年嘅不振，今年有一洗消極嘅氣勢。不過大家卻要提防，由於命宮中有凶星「暴敗」干擾，會令到事情出現被阻撓嘅情況，故此每次作出決定之前，記得先要計劃周詳，自然可以順順利利。
催財飾物：黑星石、黑尖晶石
鼠
屬鼠嘅朋友由於地支子水，遇着太歲地支午火，須知道水火相沖相剋最為厲害，呢種情況是為「沖太歲」，加上今年三煞位剛好落喺北方。由於北方五行屬水，方位主亥、子同丑，當中亥為「劫殺」方，子為「災殺」方而丑則為「歲殺」方，加上屬鼠朋友馬年本身宮位凶星亦多，如欄杆、大耗等，名副其實係四面楚歌之象，故此今年運程較為波動，凡事應以忍讓為主之餘，不論大小事均係宜靜不宜動，尤其需要謹言慎行，咁就可以平安大吉。
催財飾物：黑髮晶、黑曜石
牛
屬牛朋友地支丑土同太歲嘅地支午火形成「相害」之勢，而所謂相害即有被害嘅意思，因此稱為「害太歲」。由於今年命宮同時亦有「六害」等凶星，因此要小心被小人從中作梗，尤其係對於要同人合作嘅生意同工作更需要加倍留意，以免出現是非事端。不過屬牛嘅朋友又唔使太過擔心，皆因師傅指命宮中幸有吉星「貴人」臨照，每遇大事都可得貴人相助，大大化解災厄，咁就唔使咁緊張啦！
催財飾物：黃水晶、紫水晶
虎
虎年出生嘅朋友地支為寅木，同太歲地支午火成為「三合」，而馬年天干嘅甲木於寅木時更得長生祿，唔使師傅講都知道財運亨通啦！師傅表示呢個情況代表萬事大吉，可以話係事事順利，只係屬虎嘅朋友千祈唔好得意忘形，皆因須防命宮中嘅凶星「五鬼」同「官符」來害，做事千祈唔好太過張揚，否則容易招嚟小人同官非等嘅是非。
催財飾物：綠幽靈、橄欖石
兔
兔年出生嘅朋友地支雖為卯木，咪以為正好同太歲地支午火相合喎！情況恰好相反，卯木同午火形成「相破」之勢，是為「破太歲」。而馬年天干甲木遇上卯木則為「羊刃」，屬兔嘅朋友需要留意身體，慎防出現各種損傷。不過大家又唔使咁擔心，事關師傅表示兔嘅命宮中有吉星「貴人」同「天喜」臨照，呢粒正桃花星可以大大地增強姻緣運勢，單身男女可望得到月老紅線相連之餘，工作嘅朋友亦得到貴人相助從而提升財運。
催財飾物：海藍寶、綠髮晶
龍
龍年出生嘅朋友地支辰土，由於遇到太歲地支午火之生而有所助益，財運自然相當唔錯。此外，屬龍朋友嘅命宮有吉星「貴人」臨照關係，如此吉象不但預示財源廣進，更代表工作上往往得到貴人相助而有所得益。不過與此同時，大家要提防受到凶星「吊客」同「浮沉」嘅影響。「吊客」會對屋企人嘅健康帶嚟負面嘅作用，而「浮沉」則會帶嚟水險，大家記得要留意屋企人嘅健康同埋小心出門，平安大吉自然長搵長有。
催財飾物：琥珀、蜜蠟
蛇
蛇年出生嘅朋友地支巳火，正正同太歲中嘅地支午火成大炎之勢，加上有吉星「太陽」臨照，大炎加上太陽絕對係光芒四射，故此師傅指屬蛇嘅朋友馬年各方面嘅運氣唔錯，不論係工作定係偏財方面，都會有唔錯嘅發展。雖然光芒耀眼，但卻嫌火勢太大關係，大家嘅脾氣需要收斂，免得喺工作或生意上同人出現爭拗，對財運會帶嚟影響。此外，命宮中出現「咸池」星，「咸池」雖為桃花星，但亦為爛桃花，要注意感情事往往只係霧水姻緣。
催財飾物：碧璽、斑彩石
催動正財避太歲
做生意或打工嘅朋友都想正財得意，而師傅表示今年正財位位於正南方，想催動正財嘅朋友可以喺家中或公司呢個方位放置「貔貅」風水擺設，自然可以提升正財運勢。不過馬年正南方亦係本年太歲方向關係，如果要避免直接干犯太歲嘅話，就要將「貔貅」擺放偏左或偏右少許就冇問題。
撰文：魂
模特兒：Sheena、Cynthia、Abby（Ice Agency）
鳴謝：梅花易數玄學家常歡