少女叮噹 Charm Bracelet
有人話女人天生就係善變，其實要Read到少女們嘅喜好一啲都唔難；除咗一眾Baby御用嘅粉紅色外，「叮叮噹噹」嘅Charm Bracelet，人未到聲先到，確實又Cute又夠搶，所有少女都想要一條！加上有砌名、左拼右拼等注重個人品味和自由配搭嘅任砌玩法，令Charm Bracelet成為今期最紅的配飾。想個人Charm啲？你話有咩方法直接過將個Charm戴上手？
繽紛多變化
掀起這股Charm Bracelet熱潮的推手，必數來自英國的Links of London。多年前進駐香港後，把立體心心、鴨仔、英文字母自由組合在如橡筋具彈性嘅圈圈手箍上，吊住揈揈吓那種可愛味道，即時引起全城搶購。
及後不少品牌眼見香港少女咁Like，於是紛紛食住條水加入戰團，而且圖案和顏色吊飾設計更見繽紛悅目，變出更多元素，閃石、水晶素材或是應節的設計，務求使女生愈買愈Charm！至於造型選擇，則有手繩、手箍、手鈪和傳統手鏈款式，手繩Sporty、手箍佻脫易Carry、手鈪中性型格，手鏈就最經典，揀邊款完全視乎你性格！
第1誡：自戴難度高！
手鈪設計簡單，一個環形看似簡約，但其實難關就在眼前！手鈪的開關猶如一個小盒仔，想把手鈪扣上就要將手環一端穩固在開關扣位，單手Mode絕對唔容易！加上手環本身相當硬淨，一個鬆手彈開又要再嚟過，真係要當係耐性測試。
第2誡一Take過穿「窿」！
針無兩頭利，手鈪雖然穿戴上係有啲困難，但其換Charm機制就十分「爽歪歪」。首先Charm本身已有一個「窿」，只要手環輕輕一穿，得咗，一Take冇走雞，仲有番細個穿膠珠嗰種童真感覺添。
第3誡：「拜金」女王抬頭！
銀器向來是潮男型女嗰杯茶，屬於長青組的代表，之不過近期興浮誇，唔止妝容服裝全部都冇金不歡，喺呢個「拜金」熱潮影響之下，Charm Bracelet都愈出愈多金色設計，少少金色上身可以收到搶眼效果，總之唔好係八両金就得啦！
第4誡：好色少女！
根據非正式統計，10個鍾意戴呢種「叮噹」Bracelet的女仔，9個都係少女系，當中有8個都大愛五顏六色的繽紛感覺。若然再畀你遇上一個迷信啲嘅，你再Google吓唔同顏色嘅石有咩唔同意思或者功效（按：其實吹水效果都係一樣），佢就一定愛死你嘞！
第5誡：懶人畀個Like！
頭先講過手鈪的開關難度系數係屬於中等至偏高，若果唔想每日一起身就面對如此挑戰的話，手鏈就一定係你個好朋友；手掌一穿過就搞掂，唔使又開又關咁麻煩，懶到爆的潮人請畀Like！
第6誡：贏了Charm輸了時間！
手箍的真身是一條透明橡筋條，在上面加好多個圈圈而組成，本身未扣Charm已經可以當飾物咁戴，只不過略嫌單調咗些少。但問題來了，呢款嘢要扣Charm，先要拆解橡筋結位，然後退出相等於你想加入Charms數量的圈圈，煩過你成日都要裝修嗰個鄰居；但勝在加入Charms嘅數量理論上冇乜限制，不過當然加埋唔可以長過條橡筋……
第7誡：金銀膶先至In！
雖然戴Charm Bracelet嘅女生多數都行Cutie路線，但行開Boyish風的女生又有咩計仔湊下熱鬧呢？方法簡單到痹，就係唔揀鮮色元素手鏈或Charms，齋玩金銀兩色，兩種Metallic色互撞，試問又點會唔Cool呢！
數字人生：A Bathing Ape
11 品牌於2011年被I.T收購。
19 現時品牌於日本有19間分店，包括Bape Stores、Bape Pirate Stores、Bape Kids Stores、Bapexclusive Aoyama及Bapexclusive Kyoto。
20 品牌剛度過20歲生日，推出不少限量特別版，亦開設了期間限定的「BAPELAND」慶祝。
40 「BAPE」的名字有「A Bathing Ape in Lukewarm Water」的意思，日本人習慣於40℃熱水中泡澡，所以品牌名字亦隱約在諷刺日本新生代懶惰的習慣。
68 NIGO看過在1968年拍攝的電影《Planet of the Apes》，才將品牌取名為「BAPE」。
93 由NIGO（長尾智明）於1993年成立「NOWHERE」，售賣BAPE系列。
撰文：黃佩琪
部分攝影：梁偉德
查詢電話：（a）2265 8982、（b）2117 0265