變種滑板 Freeline扭腳「飄移」

滑板和滑雪呢兩種運動，大家冇玩過都肯定聽過，有冇諗過佢哋可以合而為一呢？講緊係外國熱爆嘅Freeline Skates飄移板（簡稱Freeline），外形似足分開咗兩截嘅滑板，但玩法卻有啲似滑雪，板仔細細前後郁得，左右傾斜亦得，仲有勁多過癮花式，真係好似喺陸上飄移咁Free！

美國傳入香港

Freeline於滑板發祥地美國加州誕生，原創者Ryan Farrelly一向鍾意玩雪板（Snowboard）等戶外運動，於修讀工程學時，忽發奇想將滑板與雪板結合並改良，Freeline遂於2005年面世，喺美國固然多人玩，原來中、日、韓等地都有不少高手，喺YouTube一搵已有勁多花式短片。雖然香港Freeline發展屬起步階段，但仍有不少愛好者，仲組成Freeline Skates Asia總會，今次約埋會長Leo出來玩，佢話總會不時舉辦活動，歡迎大家參加！

兩截滑板考平衡

想認識Freeline，最簡單是將它當成兩截滑板。不過細心一睇，會發現其板身較細，鞋底與板身的接觸面較少，控制自然較難；加上每截板嘅轆除咗可以前後移動，仲可左右傾斜，想平衡兼企定定都幾考功夫。Leo教路：「玩Freeline首先要學識平衡，建議大家一開始扶住欄杆或者搵人撐扶，嘗試慢慢移動並習慣平衡感覺。掌握到平衡後，便可試吓自由滑行，最難就係呢一步，皆因Freeline唔似傳統滑板可以踩地借力，所以要用八字步法扭腳，藉着扭腳作為動力，需要用到好多大腿內側肌肉。」

掌握基本技巧後便可像Leo咁玩，好似呢招側身滑行幾有型。

建議穿着平底板鞋，一來接觸面多啲，二來足弓位夠平冇咁易拗柴。

高難度花式動作

「正常情況下，我哋會選擇喺平地玩Freeline，如滾軸溜冰場便是合適場地，我哋常出沒嘅地方包括觀塘駿業街、長沙灣遊樂場等，基本上交通都好方便。」他補充：「雖然Freeline速度唔快，但勝在可靈活移動，比起玩滑板、滑雪嘅動作Free得多。除咗基本滑行外，Freeline甚至可以玩花式如360度轉身等，外國高手近年更創出很多高難度花式，包括雙腳換板（Switch Stomp）、單腳180度轉身踩板（Throw Back 180o Under Flip）等，連上板、煞停都有花式可玩，全部講求極高嘅身體協調同平衡力，隨時難玩過其他X-Games！」