旅人時光：廢禮物交換第一彈
「玉珠頸鏈？」當好友J拆開報紙打開錦囊看見珠鏈時震驚地大叫出來。此時此刻，我已經笑到標眼水兼有少少缺氧，其他好友也笑到不能停止，狂問我：「堅定流o架？」
「嗱！我唔知，呢條鏈係我喺阿媽嘅銀行保險箱攞出嚟，你知我家是癲的，清朝古董花瓶可以就咁當碎料插花，然後跌爛唔理，朱義盛鑽石戒指就慎重地放入保險箱保存。所以我真係唔知，我都係諗住攞出嚟博一博睇吓邊個好彩。」當我勉強回復到呼吸之時，娓娓道來這條玉珠頸鏈的身世，由大粒翠綠玉珠串成，圓潤具光澤。聽罷，大家面面相覷再表現出一個驚訝表情，然後七嘴八舌邊笑邊認真說要拿去蘇富比驗證。好友J一臉茫然，但最後也決定要盡快約蘇富比朋友鑑定。連日來，我們幾個朋友都相當關心玉珠的真偽，尤其是我，若果真是價值連城甚至是家傳之寶，我想我會後悔到撼頭埋牆死。
數日後，好友J打電話來：「我第二日約好蘇富比朋友之後那天去看有乜好做，同時我又話咗畀爸媽知，佢哋更加擔心，二話不說即刻攞咗條鏈去相熟金舖問。」他續說：「佢哋兩個望住店員拿起條鏈仔細地看，看了一陣，神色突然十分凝重，沉下聲線低聲問：『你呢條鏈喺邊度得番嚟？』此話一出阿媽更驚，說是個仔朋友送的。」
「伯母，我幾驚你或者家人畀人呃錢呀！咁都好啲。」
網址：www.facebook.com/lamwaimei/