Sarah Rutson栽培時裝小樹苗
【張嘉敏、黎志輝上海直擊】擁有160年歷史的連卡佛由老牌百貨公司蛻變成匯集國際時尚品牌的潮流聖地，也是流行時尚的地標，在時裝市場上具有領導者的地位，有此佳績，投身時裝界逾30年、身為Fashion director的Sarah Rutson這位幕後功臣絕對居功不少。而為擴大中國版圖，繼香港後，Sarah今次就把戰場移師到上海，在上海新店發揮看家本領，將最潮最時尚服飾帶到中國，成為時尚界的先驅。
現任連卡佛Fashion director（時尚總監）的Sarah Rutson投身時裝界逾30年，憑藉多年經驗與潮流觸覺及時尚品味被稱為「時尚操控者」，角色就像一個「協調者」，與設計師、買手、顧客以及媒體等各方面打交道，負責偵測潮流走向，發掘新進設計師，以及挑選每個系列的關鍵單品。為配合上海新店開幕，她選了三個新進Designer labels進駐店內。
另外，Sarah還與設計師和品牌負責人密切合作，共同建立產品間的合作和夥伴關係，例如與2012年的Taylor Tomasi Hill for Lane Crawford、J.Crew與連卡佛的首度合作更將品牌率先帶到亞洲、以及為慶祝上海新店開幕而邀請國際知名品牌Emilio Pucci、Proenza Schouler、 3.1 Phillip Lim、Jason Wu、Diane Von Furstenberg以及J.Crew特別設計T恤。
阿Sa一着即紅
Sarah這次對新進設計師的選拔是親自從逾150位中國時裝設計師中揀選出來，劉旻（Designer of Ms.Min）與劉清揚（Designer of Chictopia）就是其中兩位幸運兒。她們的系列率先在上海新店獨家發售，反應更是出奇地理想，曾一度賣斷市，就連Sarah亦有點意外。而范冰冰和蔡卓妍（阿Sa）亦先後穿上Chictopia的服裝出席活動。Sarah說：「我會幫佢哋發展佢哋嘅品牌，創造可以喺市場出售嘅時裝系列。我今次挑選設計師嘅條件係要從未喺國際時裝舞台上曝光，但要擁有國際化嘅潛質。佢哋唔單止有才華，設計上仲呈現咗中國女性嘅特色。我會幫佢哋發展佢哋獨有嘅DNA，會畀佢哋認識時裝生意，等佢哋可以Ready世界性嘅市場，佢哋嘅2014春夏系列會喺亞洲8家分店包括香港發售。」
Sarah對於培育新進設計師感到相當興奮，她自比是園丁並說：「佢哋就係我嘅小樹苗，我會悉心栽培佢哋，希望佢哋將來會成為世界著名嘅Super Star。我好鍾意劉旻嘅設計充滿現代浪漫氣息，而劉清揚嘅Print expression好出色，兩個嘅設計都非常女性化。」
Sarah亦坦言重視中國市場，她說：「中國嘅時裝系列只有春夏秋冬，miss咗巨大嘅市場，國際時裝市場有65%係pre collection，中國都需要全球性，唔好同外面嘅世界脫軌。我哋喺北京開首家專門店嘅時候，就將300幾個國際品牌第一次引進到中國市場。喺上海，我哋喺原來嘅基礎上更上一層樓，通過提升包括喺中國市場前所未有嘅個性化服務嚟加強創新購物體驗。」對於香港與內地顧客的分別，Sarah表示內地顧客對時裝抱更開放的態度，她說：「內地客人比香港客人更勇於同樂於接受新事物，以北京分店為例，佢哋最初嗰3個月會睇品牌嚟買衫，但後嚟都會睇個設計嘅style為主，唔再關心係咩品牌，純粹係自己鍾意就買，會支持本土設計師。」
走向國際舞台
對於被Sarah選中，劉旻與劉清揚都感到驚喜萬分，曾於Viktor & Rolf工作過的劉旻說：「對我嚟講創立自己嘅品牌最困難就係搵到合適嘅人幫忙。」於英國著名學府Central Saint Martins畢業的劉清揚則表示：「我唔係讀時裝設計出身，我係修讀Textile design，創立自己品牌對我嚟講最困難就係搵買家，同埋宣傳自己個品牌，喺5年前根本無時裝店想買中國設計。」不過兩人的艱辛期已過，在Sarah的培育下，兩人正逐步邁向國際時裝舞台之路。
范冰冰與蔡卓妍都分別穿着過劉清揚所設計品牌Chictopia的服裝，對此她說：「我好開心佢哋鍾意我嘅設計，因為兩位都係我好欣賞嘅藝人，多謝佢哋對中國設計師嘅支援。我覺得兩位都演繹得好靚，與佢哋嘅氣質融合埋一齊，范冰冰嗰身衣着比較女性化，蔡卓妍嗰套就比較活潑可愛，但整體感覺都好年輕、優雅又有趣。」
潮流觸覺被追捧
Sarah Rutson來自英國倫敦，曾就任於英國百貨公司採購部，其後她在連卡佛擔任資深買手，離職後她再次回巢並擔任時尚總監。
Sarah 的潮流觸覺與時尚品味深受時裝界人士及媒體欣賞，經常受訪講解流行時裝趨勢，亦獲過不少時尚獎項。她的個人穿衣風格和時尚見解都非常獨特，在各種時尚活動和時裝周騷場外，不時成為拍攝的對象。她自言時尚對於她就像空氣一樣，無法離開它繼續生存，她說：「每一季挑選出最時尚嘅單品，將佢哋展示同介紹畀更多人，令我無時無刻都覺得興奮。」