Band女拍MV HDR-MV1冇爆咪

聖誕節收咗咁多禮物，終於等到Boxing Day！由4位Band女組成的樂隊Choco，話拆禮物咁開心，梗係要Jam番首聖誕歌兼拍片擺上網。鼓女Kiki隨即拿出Sony新一代攝錄神器HDR-MV1，利用Carl Zeiss廣角鏡頭加120度X-Y立體聲收音咪，自拍MV之餘即刻Share畀粉絲，佢哋都大讚：「靚聲冇爆咪！」

售價：$2,880

120度環迴收音

想拍低原汁原味嘅MV，不僅畫面要清晰，靚聲更為重要。專為攝錄音樂短片而設計的HDR-MV1，植入X-Y立體聲收音咪，兩個喇叭向左右方向傾斜，能覆蓋120度收音範圍，而且內裏用上未經壓縮的Linear PCM音效格式，還原度之高媲美CD，並兼容Size較細的AAC LC格式，Upload短片速度更快。Choco對音色特別重視：「因為Jam歌時的音量頗大，用手機、DC等拍片經常會出現俗稱『爆咪』的破音情況，所以收音一定要好，人聲樂器聲都要清晰。」如想要聲唔要畫，新機設有錄音功能，隨時可錄低音樂創作靈感，更可加裝外置收音咪或耳筒等配件提升音效。

Carl Zeiss廣角鏡頭

畢竟香港地方狹小，好多時自拍MV連半身都未必睇到，若然要4個Band女一齊入鏡就難上加難。好彩新機的Carl Zeiss鏡頭支援120度廣角，就算於細小Band房拍片都冇問題，Choco指出：「一直用開嘅DV鏡頭冇咁Wide，唱Live時要Pan鏡取景。HDR-MV1支鏡頭便可一次過拍晒所有人。」另可利用機旁的2.7吋屏幕，畀佢哋立即重播影像，而且機身按鍵唔多，主要靠十字桿操控，話咁易上手；最重要係機身僅重165g，方便擺落手袋外攜使用。

放大圖片	支援NFC及Wi-Fi功能，利用免費手機App《PlayMemories Mobile》即可過片。

Wi-Fi連線即Share

拍完段MV，Choco話最希望可以畀粉絲即時睇。「以往拍完片，好多時要等到完Show後，拎返屋企過落電腦再Upload上網。」而新機內置Wi-Fi和NFC功能，只要以對應的手機嘟一嘟機頂即可連線，再利用《PlayMemories Mobile》手機App作遙控操作和傳送影像，咁就唔使走來走去Roll機，坐定定都可自拍短片；拍完片仲能即刻過落手機Share畀人！