SH-01F Dragon Quest 史萊姆上身

《勇者鬥惡龍》內的金屬史萊姆，高防、抗魔極難打，但由於經驗值超高，Game迷總係對佢又愛又恨。估唔到喺手機界都一樣，剛到埗嘅SH-01F Dragon Quest，由包裝、外形到介面都充滿史萊姆元素，仲要送埋《DQ VIII》App，遊戲迷點忍到手？不過佢全球限量30,000部，撲唔到貨就真係得個恨字啦！

SH-01F Dragon Quest 售價：$5,180

銀色電鍍機背

「傳說有個鍛冶職人，將金屬史萊姆熔咗，用嚟打造成一部手機……」雖然這是廠商亂口翕，但新機確實充滿金屬史萊姆影子，機背採用銀色電鍍物料，帶有鏡面效果，似足「立立令」嘅金屬史萊姆；仲印上史萊姆、龍王等角色剪影圖案，落足心思！連包裝都勁精美，原裝Box Set附送「冒險引導書」說明書及主題抹布，最正係個包裝盒竟然用咗寶箱設計，Game迷肯定Buy。

遊戲音樂變鈴聲

史萊姆可以話係《勇者鬥惡龍》嘅代表角色，因此新機介面隨處可見其蹤影，除咗主題機必備嘅專屬Wallpapers之外，虛擬Home鍵、電量及接收圖示等都變埋做史萊姆公仔，非常搞鬼！最特別係新機將遊戲背景音樂、Level Up音效等變成鈴聲，出街一響就搵到知音人。值得一提，機身防窺視屏幕都變埋《勇者鬥惡龍》主題，誠意十足。

包裝盒用上寶箱設計，主題抹布、說明書都好有心思。

接收、電量圖示都係史萊姆。

銀色電鍍機背超搶眼，細心睇會見到角色剪影圖案。

《DQ VIII》免費下載

新機會附送一個序號，用家上日本Play Store便可免費下載原價2,800日圓嘅《DQ VIII》App，簡直係賣大包！另內置一款《DQ冒險Dice》遊戲，由RPG變成擲骰玩法，可儲怪物圖鑑，感覺新鮮。機能方面，心水清嘅各位應該知道它以DoCoMo SH-01F作藍本，所以依舊搭載5吋全高清屏幕、1,630萬像素鏡頭、四核心處理器等高階規格，拍得住一眾旗艦Android手機，唔係得個樣o架！