F2.8長炮對決 Zoom盡維港夜色
近日天氣轉涼，連雲海、煙霞都唔見晒，最啱去維港影夜景。不過同女友逛尖沙咀，又帶腳架又要長鏡始終唔方便，最好梗係有部大光圈長炮DC，隨手都影到靚靚夜景啦！機Gor開相機舖嘅老友，推介Sony Cyber-shot RX10及Olympus Stylus 1長炮，兩機Zoom到盡都可用到F2.8恒定光圈，影過對面海都唔怕手震。
Cyber-shot RX10高質大Sensor
以往長炮DC一味鬥Zoom得遠，邊有人會諗過鬥畫質，估唔到RX10偏向虎山行，用上Carl Zeiss蔡司鏡頭，質素毋庸置疑。但機Gor覺得支「炮」得8.3倍變焦，Zoom到盡都係得200mm，幸好佢支援F2.8恒定光圈，加上自家製1吋大Sensor，難怪連相機舖老友都話近期勁多人Buy，拎去影夜景冇得輸！
規格表
感光元件：2,020萬像素Exmor R CMOS
焦距：24~200mm
光圈：F2.8
屏幕：3吋122.9萬像素
感光度：ISO 125~12,800
體積：129×88.1×102.2mm
重量：755g
Stylus 1 復古狙擊手
Stylus 1亦唔同人鬥遠，改玩輕身復古外形，就算擁有F2.8恒定光圈10.7倍鏡頭，Size都比其他長炮DC細得多，拎上手極輕，原來只得402g咋！而佢嘅畫質表現亦相當強，內置1/1.7吋感光元件，最重要係可經鏡頭防震系統修正垂直和水平搖晃，配合4級快門補償，影夜景絕對幫到手。
規格表
感光元件：1,200萬像素CMOS
焦距：28~300mm
光圈：F2.8
屏幕：3吋104萬像素
感光度：ISO 100~12,800
體積：116.2×87×56.5mm
重量：402g
「鏡」出名門
蔡司（Carl Zeiss）大家就聽得多，究竟有乜咁勁？其實它是一間逾150年歷史的德國公司，依生產的鏡頭結構細分為Biogon、Hologon、Planar、Sonnar、Tessar等不同種類，而RX10所使用的Vario-Sonnar則衍生自Sonnar可變焦設計，擁有低變形、低色散等特點。其他相機名鏡包括Leica、Schneider等，有趣的是它們不約而同屬德國品牌。
第1回合遠攝鬥畫質
話明長炮，梗係要鬥Zoom！雖然Stylus 1的10.7倍變焦贏咗RX10的8.3倍變焦一個身位，但機Gor揀機不僅要Zoom得遠，仲要Zoom得靚。呢方面RX10用上2,020萬像素1吋Exmor R CMOS，加上頂級Carl Zeiss鏡頭，夜攝維港實淨又銳利，由尖沙咀Zoom到會展都睇得清清楚楚。至於Stylus 1只用上1,200萬像素CMOS，質素輸咗少少。
第2回合操作要流暢
手持影夜景，有時要Zoom來Zoom去攞角度，若然操控唔就手好易「揦手唔成勢」，縱使RX10可利用鏡頭變焦環玩Zoom，但佢轉足一圈先至Zoom得少少，用落冇咁爽。Stylus 1就好貼心咁在鏡頭旁加入第2組變焦桿及操作環，換言之右手按快門時，左手可以調校設定，又或者透過變焦桿Zoom前Zoom後，機Gor手痕用嚟拍片時，變焦非常順暢。
第3回合：Wi-Fi連線就手
兩部長炮都支援Wi-Fi遙控拍攝，當中RX10的手柄對應NFC功能，機Gor用手機一嘟即可連線，透過《PlayMemories Mobile》App便能遙控拍攝和過相，連線直接兼快捷。雖然Stylus 1不設NFC功能，但利用《Olympus Image Share》手機App，同樣可嘟相機提供的QR Code連線，亦支援遙控拍攝和傳相，Wi-Fi功能不相伯仲。
達人教路：專業攝影師Felix So：「注意3個支撐點！」
「手持夜景拍攝除了要保持一定快門速度外，拍攝姿勢亦相當重要，首先要把雙腳稍微張開，紮好馬步，如果是用觀景器取景，就要將眼睛貼近View Finder，左右手肘貼近身體，利用3個支撐點穩定機身；若使用屏幕取景，應使用掛頸式相機帶，將相機向前拉扯，透過頸部和兩個手肘這3個支撐點，減少機身震動。」
機Gor Report：RdX10畫質先決 Stylus 1定價佔優
今次兩機都主打恒定F2.8光圈，不過RX10用上高質鏡頭加大Sensor，拍攝夜景相對有利，但係RX10機身成部單反咁重，留喺香港影維港還可以，如果要帶去外地旅行，反而小巧嘅Stylus 1會更適合，至少孭住行成日都唔覺累贅。機Gor就決定買部Stylus 1畀女友做聖誕禮物，一來便攜易操控，二來定價平近$3,000，荷包慳唔少！
Profile
機Gor
機不離身，不信Spec只信測試，不扮高深，懶理低俗，貪新不忘舊。
撰文：機Gor
查詢電話：（a）2345 2966、（b）2376 2150