206度扭鏡怪攝! OPPO N1 Selfie變靚啲

潮流興自拍，無論港女、日女定世界女都有鋪自拍癮，間接令「自拍（Selfie）」一詞獲英國牛津字典選為2013年風雲詞彙！然而Selfie除了需要一點技巧外，自拍神器亦不可少，最近發表的OPPO N1就名副其實為自拍而生，內置206度旋轉鏡頭及美顏模式，無論任何角度都可拍出V煞靚樣，新機預計下月正式抵港，買嚟冧女冇得輸！

扭鏡頭影V煞臉

靚女自拍有十式，但點樣用手機拍得靚就唔係人人識，揸機角度差啲仲要現晒雙下巴，認真趕客。N1最大賣點係內置可206度旋轉的1,300萬像素鏡頭，由6組鏡片及67個零件組合而成，用家只要將鏡頭向前一扭，即可利用5.9吋全高清大芒取景自拍，保證靚樣入晒鏡！Model試玩後更立即點出鏡頭優點：「平時自拍想下巴尖啲，一定要舉高手影，揸耐咗好易手震。但只要將呢部機嘅鏡頭向下扭，就算水平揸機都可影出V煞臉效果，唔使再理咩角度了。」

O-Click遙控影長腿

取景方便，估唔到新機連掣呢一環都設想周到，除提供虛擬按鍵及音量快門掣外，機背約12cm2面積嘅O-Touch觸控背板更可當作快門使用，輕輕一敲即可拍攝，單手自拍方便到暈！嫌未夠User Friendly﹖跟機仲有個O-Click藍芽遙控器，一經連接即可於15米範圍內遙控手機快門，離遠自拍影埋長腿都掂。O-Click還支援防盜功能，當手機超出5米範圍即會發出提示聲，唔怕賊人有機可乘。惟遙控器連接後都幾食電，建議唔用時最好先解除藍芽連線。

售價︰待定

鏡頭可整個向前翻，廠商指能夠承受十萬次轉動，堅喎！

O-Touch背板可當作快門使用，單手自拍勁就手。

美顏模式輕鬆換妝

靚女特別奄尖，單靠鏡頭當然滿足唔到佢哋，所以新機還加入美顏模式，可以美白、瘦面之餘，仲提供淡妝、彩妝、性感、日系及韓系等7大美妝效果，變臉一按辦妥，化妝品可以掉埋一邊！其他「分唇」如Ｆ2.0大光圈、HDR及全景拍攝全部有齊，並支援0.6秒快門啟動及8秒長時間曝光，無論Snapshot定影聖誕燈飾都難佢唔到！效能則算中上，1.7GHz四核心處理器配2GB RAM，跑分跟S4相若；而電量達3,610mAh，若用3G上網的話勉強夠玩一天。此機目前只限內地發售，定價為人民幣3,498（折約港幣$4,450），預計12月在港上市。

喇叭、microUSB及3.5mm介面均設於機底。

一體成形設計，換卡要拮開SIM卡槽，唔係咁方便。

跟屏幕同為5.9吋的HTC One Max（右）比較，OPPO N1（左）輸出較光，顏色亦較鮮艷。

跟屏幕同為5.9吋的HTC One Max（右）比較，OPPO N1（左）輸出較光，顏色亦較鮮艷。

同場加映：自拍神器攻入手機界

除了N1外，其他廠商亦先後推出自拍手機。當中由《美圖秀秀》開發商推出的MeituKiss一定最爆，不但提供純白、粉紅兩色機身冧女，還內置專為亞洲女性而設的美顏技術，可瞬間淡化黑眼圈及精緻五官等，喺佢嘅鏡頭下再冇醜女！日本方面，下月亦有部DoCoMo F-03F，在美顏模式以外加入大量Disney卡通濾鏡，自拍時米奇老鼠入埋鏡，女生一定畀Like！