曲芒測試　G Flex能屈能伸

大丈夫能屈能伸，原來大芒手機一樣做得到，由水路到港的韓國LG新貴G Flex，坐擁6吋巨型曲芒，手感佳、睇片正之餘，最神奇係機身受壓後即可變平，插落褲袋坐落去都唔驚爆芒。由於貨源甚少，定價高開$7,680，貴就貴咗啲，但拎出街盡收注目禮，點都值得！
G Flex 售價︰$7,680
G Flex 售價︰$7,680

上下彎曲 超強抗壓

LG近年力谷曲芒產品，除了Curved OLED電視，智能手機係另一戰場。跟對手GALAXY Round左右兩邊彎不同，G Flex機身頂部及底部微微以24度彎曲，呈現由上至下的曲芒效果。小記齋睇G Flex已覺得佢彎得靚好多，放在枱面直頭可當搖搖板咁玩，而傾電話時嘅貼面程度更媲美一代Nokia「蕉王」，收音都清晰啲！新機另一賣點係擁有超強抗壓能力，手機受壓時會由曲面變成平面，最高可承受40kg壓力；實測時，小記要成身出盡力先能將佢整平，想坐爆芒都唔易。

戲院觀感 防刮機背

新機嘅屏幕足足有6吋大，對角線達152.4mm咁長，配合彎曲設計，驟眼睇屏幕比同尺寸手機更大。小記以「少女時代」MV測試，發現曲芒予人一種戲院大銀幕的感覺，眼睛很容易聚焦到中央，而且左右兩邊畫面跟雙眼距離較平均，觀感比傳統屏幕更具臨場感。惟720p解像度略嫌偏低，P-OLED面板又有少許偏藍問題，否則一定攞滿分。大芒以外，機背亦內有乾坤，除提供音量加減及開關實體鍵外，其物料更具備自我修復功能，唔小心被指甲或硬物刮到，花痕會隨時間自動消失，唔講仲以為係太空科技。

內置Flex轉頁效果，頁面會彎彎地轉動，滿有立體感。
  • 內置Flex轉頁效果，頁面會彎彎地轉動，滿有立體感。
一體成形設計，要拮開micro SIM卡槽才能換卡，頗為麻煩。
  • 一體成形設計，要拮開micro SIM卡槽才能換卡，頗為麻煩。
植入同廠G2嘅機背按鍵，單靠食指便可開機及調校音量。
  • 植入同廠G2嘅機背按鍵，單靠食指便可開機及調校音量。

壓力測試<br>用力壓平機身，屏幕依然冇裂開，證明真係能屈能伸。
  • 壓力測試
    用力壓平機身，屏幕依然冇裂開，證明真係能屈能伸。
刮背測試<br>機背新物料懂得自我修復，指甲刮的花痕一瞬間便消失。
  • 刮背測試
    機背新物料懂得自我修復，指甲刮的花痕一瞬間便消失。
插袋測試<br>曲面機身完全緊貼股形，插落褲袋Curve位Fit到漏。
  • 插袋測試
    曲面機身完全緊貼股形，插落褲袋Curve位Fit到漏。
試片區<br>跟差唔多Size嘅HTC One Max（上）比較，睇片時G Flex（下）視野較為廣闊，但色彩輸出就不及對方亮麗。
  • 試片區
    跟差唔多Size嘅HTC One Max（上）比較，睇片時G Flex（下）視野較為廣闊，但色彩輸出就不及對方亮麗。

原生中文 對應4G

新機叫價$7,680，皆因曲芒夠噱頭外，頂級規格亦是主因。其硬件跟同門G2幾近相同，內置2.26GHz四核心處理器、2GB RAM及32GB內存，開Apps多工運算都唔窒，Benchmark跑分更超越對手Note 3，相當誇張！系統則是Android 4.2.2，韓、英介面當然有齊，最爆係原生已經備有繁體中文介面及輸入法。功能方面，記事用的《Q Memo》及遙控工具《Q Remote》亦有預載，廠商更為曲芒追加Flex轉頁效果，頁面轉動時有彎曲感覺，同機身襯到絕！值得一提，此機已對應本地4G網絡，上網唔怕變龜速。

規格表

制式︰GSM、WCDMA、LTE、LTE-A

處理器︰Snapdragon 800 2.26GHz四核心

記憶體︰2GB RAM、32GB內存

屏幕︰6吋Curved P-OLED（1,280×720解像度）

鏡頭︰（前置）210萬像素、（後置）1,300萬像素

對外連接︰藍芽4.0、microUSB、Wi-Fi、NFC

電池容量︰3,500mAh

作業系統︰Android 4.2.2

體積︰160.5×81.6×8.7mm

重量︰177g

曲芒未來發展

除了早前試玩的GALAXY Round及今次的G Flex，未來曲芒手機仲陸續有嚟！據Samsung最新Roadmap顯示，明年彎曲（Bended）屏幕便會面世，比現時的曲芒（Curved）更彎更柔軟。2015年底至2016年初，更會開發出可摺疊屏幕（Foldable），令機身體積大減。另一邊廂，傳聞Apple亦有意為下一代iPhone加入彎曲屏幕，孰真孰假來年自有分曉。

查詢電話：2374 0618

撰文︰陳志滔

攝影︰胡振文