入樽飛人 1:6格芬

回歸門市發售

NBA明天開鑼，焦點除咗落喺Derrick Rose傷愈復出，以及LeBron James能否三連霸外，Griffin有乜誇張入樽動作亦叫人期待。取得NBA「拉臣」的Enterbay，早前已推出1:6大帝Figure，下月會再發表「飆風玫瑰」Derrick Rose，而夾在中間檔期的，正是早前於限定Pop-Up Store首發的格芬。如今限定店已完，Figure將回歸門市發售，球迷記得把握機會訂購。

兩款逼真頭雕

同之前波神Michael Jordan Figure一樣，格芬的頭雕由Scuderia操刀、YJ上色兼監修。小記早前睇Enterbay主腦Bill嘅微博時，已發現試辦有極高神似度；如今大貨所見，起碼Keep到九成水準以上，基本輪廓、鬚根及膚色都似足真人，配合招牌八字眼及栗子頭，保證球迷一眼就認出係入樽王。唯一要彈係佢嘅「正常Look」太木獨，「O嘴Look」又似冇牙阿伯咁詼諧，然而睇番NBA片段會發現佢入樽時真係咁嘅樣，難怪廠商要咁整啦！

以真波衫作藍本，人名大小及號碼位置都似層層。

白色護肘富彈性，唔怕阻住麒麟臂伸展。

多關節新素體

格芬貴為2011年All Star入樽賽冠軍，所以廠方特別為佢開發全新NBA-BG素體，不但有13吋高，關節數量仲多達40個，其中膝關節用咗仿MG高達模型嘅雙關節設計，雖然冇包膠Body咁靚，但有效令Figure 嘅屈膝幅度更大更自然，擺甫士更傳神。服飾方面則是快艇去季作客球衣，剪裁適中之餘，隊徽、人名仲跟到足，美中不足係冇送埋短袖款式新波衫，腳上的Super.Fly 2波鞋飛走咗Logo。另外，配件得Spalding磁石波、5對可換手及一個圓形地台，着實太少，起碼都送埋入樽賽獎盃或最佳新秀獎吧！

沿用圓形仿木地板地台，並印上快艇隊徽。	附送Spalding磁石波，配合磁石手就可凌空拎起。	膝部用咗雙關節，屈膝零舍自然。
附送5對可換手，射波、指天、拳頭等動作有齊晒！	鞋款參考Super.Fly 2，但因版權問題Jumpman Logo冇得落。

同場加映

All Star籃球明星珍藏展

為配合NBA開鑼，除了Enterbay推出新NBA Figures外，旺角雅蘭中心由即日起至11月4日期間，更舉行All Star籃球明星珍藏展，展出價值過百萬港元的籃球明星珍藏品，以及限量「EB八周年紀念版」Michael Jordan手辦公仔。用家可於活動期間到大堂的特製巨型籃球架，一嘗入樽滋味。

撰文︰陳志滔　

攝影︰郭凱敏

查詢電話︰2332 3615