日本嘅手機Apps向來有唔少獨家遊戲，奈何外國用戶無法登陸下載；多得《Puzzle & Dragons》帶挈，身邊唔少用開Android手機嘅朋友問起：「點先可以入到日本Google Play單撈嘢呀？」今次小記一於傳授各位登陸方法，順便推介幾款熱爆遊戲如《CHAIN CHRONICLE》等，仲唔快啲單撈嚟玩？
依家Google Play分晒地區，香港Android用戶一開機便自動入番本地市場，想玩日本獨家遊戲唔通只能望門興嘆？其實只要識得利用網上免費的VPN（Virtual Private Network）服務，便可輕鬆進入日本Google Play下載心水遊戲。不過小記建議各位，最好揀免費Apps下載，皆因付費Apps需要用家填寫信用卡等資料，加上經VPN買嘢有一定風險，想網上購物就要風險自負啦！
SEGA的《戰場女武神》於2008年推出時叫好又叫座，廠商當然食住條水大玩同類畫風遊戲，今年就有《CHAIN CHRONICLE》出籠。新作承繼水彩畫風角色設計，最重要是玩法糅合塔防元素，玩家要為不同職業的夥伴布陣攻擊，過關後還可得到寶石抽人物卡。而每場戰鬥時間都算短，等車等人時玩番鋪就最啱。
售價：免費
前排Capcom推出《鬼武者Soul》掀起一陣熱潮，不過由於係網頁遊戲嘅關係，始終唔方便周街玩。今次廠商火速開發出手機版，更可與電腦版共用遊戲資料。同《鬼武者》系列一樣，新作以戰國時代做背景，分為人、鬼、幻魔3大陣營，登場角色差唔多有成千人，可以一次過滿足玩家睇戰國歷史、收集人物的欲望。
售價：免費
由十幾年前逃離密室Flash Games，到近期香港興起的真人逃脫，這些逃脫遊戲一直都冇Out過。《THE脫出ゲームX》仲更加勁，因為玩家除咗要用觀察力搵線索離開房間，仲要踩過界做埋伽利略，在關卡中破解懸疑謎團。故事講男主角被神秘人捉入實驗室，玩家要盡快搵路走，仲要解開失蹤的未婚妻到底是生是死之謎。售價：免費
除咗Andriod陣營，其實日本App Store都有唔少好玩嘅iOS遊戲，如9月剛推出的塔防戰略《MELPHARIA MARCH》、俄羅斯方塊打怪《Tetris Monster》等；仲唔使經VPN申請帳號咁麻煩，所以早有不少用家跨區下載遊戲，方法是利用日本iTunes Card，開啟日本帳戶並為之充值，更可直接購買付費遊戲或In-Apps道具。
撰文：孔慧思
部分攝影：郭凱敏