大芒潮機黃金周鬥法

咁啱今期至Hit嘅大芒手機Sony Xperia Z1及Samsung GALAXY Note 3開賣，前者玩AR擴增實境兼高像素鏡頭，後者有招牌神筆S Pen，梗係要帶埋佢哋出街「招呼」親友。

Xperia Z1 靚相先決

Sony近年出機部部都有Gimmick，年頭先有全高清芒Xperia Z，早前整咗部6.44吋「巨無覇」Xperia Z Ultra，啱啱9月再發布Xperia Z1，雖然佢個樣同Xperia Z有九成相似，但原來今次Sell靚相。機Gor問先達手機舖老友，點睇部新機嘅前景，佢話之前Xperia Z大賣，連內地客都特登落嚟搶，所以今次對Z1好有信心，尤其是新機植入2,070萬像素鏡頭，又加入擴增實境等過癮功能，肯定冧盡不少用家。

玻璃面機背加上紫色配色，女士實Buy。	Z1機側保留金屬開關鍵和防水保護蓋設計。	DRAW Xperia Z1備有防水功能，帶出街遇着落雨都冇問題。

規格表

制式︰GSM四頻、WCDMA、LTE

處理器︰2.2GHz四核心

記憶體︰2GB RAM、16GB內存、 支援microSD

屏幕︰ 5吋IPS（1,920×1,080解像度）

鏡頭︰（前置）200萬像素、（後置）2,070萬像素

對外連接︰藍芽、microUSB、Wi-Fi、NFC

電池容量︰3,000mAh

作業系統︰Android 4.2

體積︰144×74×8.5mm

重量︰170g

GALAXY Note 3 手寫神筆

兩年前Samsung喺德國IFA展覽前發布第一代GALAXY Note手機，記得當時人人都唔睇好5.3吋巨芒手機，點知後來大賣，搞到一地眼鏡碎。嚟到第3代，GALAXY Note 3同樣喺IFA發布，屏幕增大至5.7吋，大玩仿皮背殼之餘，又有S Pen手寫神筆，可惜大多網友話支筆創意不足。言猶在耳，點知早幾日開賣一樣大受歡迎，機Gor仲發現部分門市賣斷市，風頭仲勁過iPhone 5s！

DRAW 拉出S Pen便會自彈出半圓形Menu，凌空操控都掂。	售價︰$5,998(3G版)、$6,198(4G版)(b)	今次機背大玩仿皮物料，手感唔錯。

規格表

制式： GSM、WCDMA、LTE（4G版）

處理器：1.9GHz八核（3G版）、2.3GHz四核（4G版）

記憶體：3GB RAM、16GB內存、支援microSD

屏幕：5.7吋（1,920×1,080解像度）

鏡頭：（前置）200萬像素、（後置）1,300萬像素

對外連接：藍芽、microUSB、Wi-Fi、NFC

電池容量：3,200mAh

作業系統：Android 4.3

體積：151.2×79.2×8.3mm

重量：168g

擴增實境知多啲

擴增實境（Augmented Reality，簡稱AR），是透過鏡頭影像的特定角度和位置，將虛擬畫面如圖像、文字等，與實境結合並進行互動。近年AR應用愈趨廣泛，當中包括手機Apps《Sky Map》、PS Vita遊戲機的「AR Play」遊戲卡等。今次Xperia Z1更將AR功能置於拍攝介面，令影相趣味大增。

ROUND 1：排隊等人試屏幕

每逢假期，啲乜樂園物公園肯定爆到七彩，排隊多過乜，機Gor點會咁浪費時間，一於邊等邊煲劇睇片。兩部新機都擁有全高清巨芒，即場試睇《狄仁傑之神都龍王》Trailer，Z1個5吋TRILUMINOS屏幕配合X-Reality處理器，睇落色彩還原度又高又清晰，不過略嫌可視角度低咗啲，在陽光底下側少少睇已經有反白情況。而Note 3個芒有成5.7吋，比Z1仲要大0.7吋，睇片明顯舒服啲，不過佢採用SUPER AMOLED面板，有人彈佢「味精」過重，有人鍾意佢顏色鮮艷，機Gor就幾Buy喇！

ROUND 2：到此一遊鬥攝力

遊覽景點，又點可以唔影張到此一遊呀？單睇Z1嘅2,070萬像素鏡頭，已經贏Note 3幾條街，仲內置1/2.3 Exmor RS感光元件，又喺Sony DC移植G Lens鏡片；機Gor試拍星光大道時，影像質素超班，仲可以玩埋AR效果模式，將虛擬卡通圖案與實境融合，把星光大道變成「侏羅紀」，呢張相仲唔夠晒難忘？而Note 3嘅鏡頭有1,300萬像素，仲有戲劇效果和有聲拍攝等模式，不過拍攝質素始終冇Z1咁好。

ROUND 3：特異功能激戰

除咗大芒同影相之外，兩部新機同樣有耍家功能。咪睇Z1機身咁薄，其實佢支援IP55/58防水防塵功能，掉落1.5米水深都可以玩到30分鐘，橫風橫雨行街Shopping都唔怕雨水整濕部機。至於Note 3嘅招牌神筆S Pen亦唔嘢小，從機身拉支筆出嚟即會彈出懸浮選單，可以用到《Action Memo》記事、《S Note》畫畫等，方便喺靚相上面整色整水；最重要係S Pen靈敏又準確，可說實用與娛樂兼備。

機Gor Report：Z1靚相加靚樣 落雨也不怕

若果追求靚樣兼靚相，Xperia Z1嘅薄切紫色機身加上超高像素鏡頭肯定滿足到各位。而Note 3雖然外觀新鮮感欠奉，但硬件效能吸引，好似2.3GHz四核加3GB RAM，仲有加強版S Pen，機Gor亦好Like。當然，若然天氣不似預期，Z1嘅防水功能就會跑出啦！

達人教路

科技網站ePrice編輯Alex Chow表示：「近年手機屏幕一味鬥大，但唔代表芒愈大就愈着數，一定要顧及單手操控的便利性，所以買機前最好去電器連鎖店試拎吓實物，仲要留意手感，如Xperia Z1雖然設計靚啲，但玻璃表面令機身有點跣手；反而Note 3的仿皮機背，手感好好多。」

Profile

機Gor

機不離身，不信Spec只信測試，不扮高深，懶理低俗，貪新不忘舊。

撰文︰機Gor

查詢電話：（a）8203 8863、（b）3698 4698