Moto X 252種配搭創意任砌

iPhone 5c今次玩5色機身搭6色機套，可以撞出30種配搭。不過咁都未夠好「色」，剛從美國抵港嘅水貨機Moto X，無論機面、機背以至機側按鍵都可以畀你揀顏色，計落有成252種配搭，色彩任砌！最過癮係連耳機、配件都可以揀唔同顏色襯番機身，以後唔怕同人撞機喇！

售價：$5,980<br>（連SOL REPUBLIC Jax耳機及Motorola Skip配件）

售價：$5,980
（連SOL REPUBLIC Jax耳機及Motorola Skip配件）

玩盡配色

作為Google收購Motorola手機業務後嘅頭炮，Moto X當然要有番咁上下賣點。今次竟然玩DIY元素，用家只要到廠方motomaker專頁，便可透過「Design Yours」揀手機顏色，黑白機面、18色機背、7色機側按鍵及後鏡頭圍邊均可選擇，低調、搶眼任君選擇。而水貨暫時返咗兩款Moto X，分別係黑面綠底及白面桃紅底，兩機均用上黃色按鍵，撞色都幾清新；加上磨沙塑膠背殼唔易黏手指紋，弧形設計手感舒服。如果想自己揀顏色的話，水貨舖還可幫各位代訂，預計10天左右到貨。

超清Crystal Talk

除咗機殼可以襯色，其實廠商仲搵咗著名耳機品牌SOL REPUBLIC合作，買機時可另購入耳式或耳罩式耳機，前者有16種配色，後者亦有9色選擇，夾埋主機戴出街零舍搶眼！規格反而唔係Moto X嘅重點，4.7吋720p屏幕、1.7GHz雙核心處理器似乎比其他旗艦機輸蝕；幸好屏幕清晰又鮮艷，處理器經過自家X8 Mobile Computing System優化後，整體用落好順暢，表現合格有餘。新機仲保留咗Motorola年代嘅招牌Crystal Talk技術，傾電話時可將背景雜音除去，搭車傾電話都唔怕沙沙聲！

備有1,000萬像素Clear Pixel鏡頭，旁邊嘅喇叭亦相當好聲。

機側按鍵都玩埋顏色，備有7色選擇。

熄芒玩聲控

除咗配色有突破，軟件和功能同樣有驚喜。好似拎住手機時，連續扭兩下手腕便會啟動機背1,000萬像素鏡頭，Snapshot超爽手；最特別係其聲控功能，喺熄芒情況下講「OK Google Now」，手機會自動着芒兼開啟Google Now功能，跟手仲可以聲控手機幫你撥號、搵路、查天氣等，玩落比對家嘅Siri醒目。新機仲引入Active Notification功能，屏幕會間歇亮起，顯示時間、日曆、未接來電等資訊，等大家唔使成日Check住個芒，好貼心！值得一提係新機屬美國AT&T版本，喺香港可以即買即用，不過唔支援香港4G制式。