嚇人主場 搞乜鬼？
咁搞鬼？搞乜鬼？中秋節都就快到，鬼門關理應已落閘閂門，偏偏有一大班頑皮鬼勁搞鬼，將兩大主題公園變作「恐怖主場」玩嚇人，貪玩到極！自問也是好玩一族的你，有冇興趣Join埋一份呢？
「嚇」場直擊Part 1
迪士尼黑色世界
受驚大嗌嘅經驗，你我都試過。再次被黑色世界「包場」嘅迪士尼樂園，就希望「嚇」人有所突破，於是以「好玩‧唔好叫」作為今年嘅派對主題，向一眾貪玩人士「宣戰」……
7大黑點 「異」演添驚喜
未中秋，先驚喜！「黑色世界」早早回歸迪士尼，換上Halloween造型嘅米奇、美妮當然係焦點人物啦！造型恐怖嘅「大頭寶寶」，亦已現身反斗奇兵大本營送「嚇」！
至於不日登場嘅節目包括Encore之作——「詭墳學院」及「黑色馬戲班」，前者乜學生都收，只要夠「勇」就能夠順利畢業，而馬戲班班主就會開放其斷頭台、化妝間，畀大家一個Surprise。灰熊山谷則會舉行「灰熊山谷黑色嘉年華」，分設5個經典遊戲攤位，滿足大家嘅貪玩欲望。而最令人期待嘅「黑色嘉年華『異』演」，將於探險世界上演，並由「火燄神」、「冰女王」、「蝙蝠紳士」、「黑鳥夫人」、「瘋骨妖姬」及「森武士」齊齊孭飛。
提提大家，場內嘅驚嚇節目要到10月4日才正式開放，屆時可憑場內派發嘅闖關手冊，挑戰7大主題驚嚇黑點，實行同班Friend鬥唔驚。
迪士尼黑色世界
詳情： 10月4日至31日（逢星期四至日），樂園將延長開放時間至11:00pm，大小朋友可按入園時獲派之手冊，玩盡園內7大「黑點」。
門票： 日票$450（可玩足全日）、夜票$299（下午6時後入場適用）
查詢電話： 1830 830
「嚇」場直擊Part 2
海洋公園哈囉喂全日祭
講到搞鬼，海洋公園一向鬼主意多多，舊年有「聖羅蘭」，今年則有「腥」級靈媒龍婆壓陣，6大鬼屋雲集各方牛鬼蛇神，而且分為「輕量級」和「大膽級」，實行由細嚇到大……
6大鬼屋 由細嚇到大
講到嚇人，龍婆羅蘭姐堪稱神枱級人物，由她領導嘅喪屍妖精，驚嚇度不用懷疑。今年海洋公園就特設「羅蘭靈異古董店」，以「龍婆」羅蘭的「鬼聲」導航，引領大家穿越時空，重回老香港，見證各式「驚」典場面，為探險旅程揭開序幕。自認是膽小鬼，則可由「輕量級」開始挑戰，走入「南瓜怪傑工作室」，一睹雕刻大師Ray Villafane嘅南瓜雕刻，場內仲有一個重1,000磅嘅巨型南瓜，保證令你大吃一驚！
值得一提，過往園內嘩鬼只會趁入夜出沒，今年則首次舉行「哈囉喂全日祭」，探鬼行程可以由日頭玩到夜晚，大家可盡情嚇餐飽。
大膽級
羅蘭靈異古董店
由「腥」級靈媒羅蘭姐以鬼聲引領大家參觀已夠「驚」典，藏身古董嘅凶靈更會捉人陪葬，不想成為人家嘅「屍」人珍藏，醒定啲喇！
驚嚇指數：4分（以5分最驚）
凶靈工廠
表面係一間廢棄工廠，其實係殺人狂魔嘅屠宰場！一旦進入此地，謹記提防枉死怨靈嘅追殺，盡快尋找逃生出路……
驚嚇指數：5分
韓流「懼」星狂熱
韓流狂熱延至陰間？一班簽訂「死」約嘅過氣霉星怨靈，打扮得鬼火咁靚，又瞓身大跳勁歌熱舞，希望吸引Fans，吸取「人氣」，小心被迷倒現場。
驚嚇指數：3分
輕量級
南瓜怪傑工作室
70多張表情各異嘅「南瓜面孔」集體出場，全部出自雕塑大師Ray Villafane之手。場內更可發現一個重達1,000磅嘅巨型南瓜呢！
驚嚇指數： 2分
古靈精怪魔法屋
坐落隱秘森林嘅幽靜小屋，原來是南瓜妖精國王嘅魔法居所，當中暗藏各式迷幻布置，啱晒好奇嘅小朋友。
驚嚇指數：1分
M&M’S®走鬼大逃亡
科學怪人開Party，理應好恐怖，卻多了一班不速之客搞鬼，原來朱古力豆也來湊熱鬧，問你服未？
驚嚇指數：2分
海洋公園哈囉喂全日祭
詳情： 10月1、4~6、11~14、17~20、24~27及31日舉行，搞鬼時間為10:00am~10:00pm。
門票： 港人以正價購買入場門票可享85折優惠，成人價$272、小童價$136；另設「哈囉喂優越門票」（可由早到晚優先進入園內16個景點）成人價$628、小童價$314
查詢電話：3923 2323
撰文：郭淑怡、何詩敏
攝影：郭凱敏、梁偉德
模特兒： Amy、Irina（Gaiety）、Jayden（3INDIGO）