何嘉莉教路秋冬fashion trend

時裝潮流每季也來去匆匆，當你刨畢所有時裝雜誌及各大時裝騷，以為終於捕捉得到它時，抓住的往往只是尾巴而已，聰明的做法是聽聽潮人的總結，把潮流狠狠地擁在懷裏。

秋冬潮流三大提示

黑色流蘇連身裙外穿紅黑色間條外套，平衡鮮艷與深沉，配襯一雙搭帶高跟鞋，輕易製造優雅不失活潑的輕熟女風潮。

老虎圖案針織衫襯以百褶短裙，配上黑色綴窩釘短boots，黑色皮褸則撞金屬色手袋，帶點叛逆的英倫味道。

何嘉莉（Lillian）對秋冬潮流有三大提示，首先是印花（prints），她舉例說：「今季流行prints，尤其係animal prints，無論係斑馬紋、豹紋、蟒蛇紋都係大熱，另外就係格仔，好似千鳥格、check、tartan等等，其次係floral print。」第二是反光物料，例如閃片或metallic顏色；第三是運動風。不過，要將所有大熱元素配搭上身也要講技巧，Lillian親自配搭了iBLUES幾套時裝作示範，例如她會選擇帶點sporty及中性味道的虎紋圖案鬆身上衣，但下身襯比較女性化的百褶裙，使整體效果剛柔並濟；Lillian亦示範以富書院味的恤衫及格仔冷衫，配合rock味皮革短裙，合併兩種截然不同的風格。

放大圖片	牛仔恤衫加黑白格紋外套，加上黑色皮褲及黑色boots，配以闊身斑馬紋clutch，營造one-toned boyish style。	Agyness Deyn
Alexa Chung

雖然每季都有hit items，但Lillian提醒各位，時裝潮流轉得快，所以買衫時還是選擇適合自己風格的東西，切忌盲目跟風，她以個人為例：「我每季只係會重點買幾樣must have，再同自己固有嘅衫mix and match，而唔會買晒當季熱門嘅嘢，因為到下季就着唔到。」

先天不足後天彌補

問到潮人是如何煉成的？Lillian稱潮流觸覺有先天及後天，有些人先天對美感及顏色非常敏感，但如果先天不足，也可以後天彌補，就是從時裝雜誌及網站吸收潮流資訊，培養美感，她說：「我諗自己後天努力緊要啲，我好鍾意藝術，亦係讀繪畫，但將呢方面付諸時裝上又係另一樣嘢，所以我會睇好多時裝雜誌同網站，依家好多網站都睇到外國新一季嘅時裝騷，你會發現唔同品牌都有個trend，用埋某幾個元素，之後我就會再出街行時裝店。雖然依家好興網上購物，但網上始終唔及實際，因為網上（嘅衫）唔可以摸上手，亦唔可以試上身。」

有人以為要成為潮人，必定要有一定財力，Lillian對此並不認同，她指大牌子的剪裁及用料固然比較優質，但不少價錢相宜的品牌其實也不差：「你諗吓個trend轉得咁快，如果吓吓買咁貴嘅嘢，真係唔划算！衫褲可以買平嘢，但鞋同手袋我會好捨得花錢，因為鞋、袋好易睇得出平貴，而且鞋太平會『着壞腳』。平衫只要襯番一個靚袋同一對靚鞋，就會將整體感覺提升。」Lillian亦分享了兩個永恒must have items，就是太陽眼鏡與clutch：「太陽眼鏡真係好神奇，有功能性，亦可以增加星味；clutch亦好好配襯，配日裝可以好有型，配晚裝又可以好grand。」

那麼，對於「less is more」又是否認同呢？Lillian笑言有點矛盾：「less is more雖然唔係最fashion，但係最classic，愈簡約愈唔容易錯㗎。可以將好多嘢放上身又襯得好嘅人，先係高手。我着衫有個原則，就係身上嘅顏色唔可以多過4種，平衡得嚟唔會對比好大。」

終極目標

Lillian與Moiselle太子爺陳柏熹去年開始經營樓上時裝店，兼任形象指導的她，無論外形與工作方向跟另一潮人徐濠縈愈來愈相似，Lillian直言視對方為目標，但發展方向又不盡相同，她說：「佢好成功，佢嘅時裝店已經上晒軌道，但對我嚟講，時裝店唔係我終極目標，我希望將時裝店變得比較lifestyle，賣啲生活小品、書籍、CD之類。」

眼中潮人

人稱潮人的Lillian，她眼中的fashion icon又是何許人呢？自言喜愛英倫風及中性打扮的她所選的潮人也跟兩者有關，她說：「我早幾年鍾意英國超模Agyness Deyn，佢比較中性，好有型，近期鍾意英國潮女Alexa Chung，佢着到嗰種英倫味道。」

採訪：陳嘉敏

攝影：沈健程

服裝：iBLUES