電視劇中，Sam哥要10年後先喺續集再現，而遊戲界嘅Sam哥就好啲，抖3年便可再出動，而且威到有架私人隱形運輸機，載佢去全球14個地區。好歎？咁又唔係，Sam Fisher在新作《Splinter Cell: Blacklist》入面，要飛到中東、北非等烽火大地，清除恐怖分子。好在今集佢有多款新武器支援，潛入刺殺時仲會因應玩家行動而獲得獎勵，粉絲應該收貨啦！
Sam Fisher一向有好多粉絲，戴上「三眼仔」式夜視鏡係佢嘅招牌打扮。自3年前完成咗《Splinter Cell: Conviction》任務之後，恐怖分子再次組織名為「Blacklist」嘅恐怖活動，所以Sam哥又要出動。只需要向美國總統負責嘅Sam哥，今次搵來新隊員包括科技專家Anna、黑客Charlie同軍佬Issac幫手反恐。新梯隊仲有私人隱形運輸機，所以就算去完倫敦，再去利比亞、車臣以至巴拉圭執勤都冇問題。
《Splinter Cell》向來係靠主角Sam哥嘅矯捷身手，無聲無息潛入執行任務，唔似得一般射擊遊戲咁多駁火場面。不過喺新作入面，開發小組加入咗新系統，容許玩家以唔同風格完成任務，無論採用慣常潛入的「Ghost」風格、速戰速決的「Assault」風格，又或者傾向駁火的「Panther」風格，都會得到唔同獎勵。不過今集難度都唔低，一不留神被恐怖分子發現，都唔係咁易走得甩；但遊戲相當貼心，角色被發現的位置會出現「鬼影」，玩家可遠離「鬼影」避難，或伺機做低對手。
遊戲中好多昏暗場景，要遠距離瞄準已經唔易，部分敵人仲戴埋頭盔，Headshot都要幾槍先搞得掂，反而諗計潛行到佢哋背後偷襲更有效。今次Sam哥仲可以更換唔同武器裝備添，有啲會加強防衞性，有啲會減低行動時嘅聲響，但樣樣都要畀錢買，執勤時要賺多啲錢先得。上集開發商抽走咗好多粉絲鍾意玩嘅「Spies vs Mercs」間諜對傭兵模式，好在今集有得玩番，每邊各有4人，扮傭兵一隊更會以第一身射擊作戰，火力比間諜隊猛，但移動能力較弱，唔知大家會點揀？
類型：動作射擊
開發：Ubisoft
平台：PS3、Xbox 360、PC
推出日期：9月5日（中文版）
售價：$388（PS3）、$360（Xbox 360）、$299（PC）
查詢電話：2359 7998
撰文：布偉倫