三大服務追加 LINE隊Shopping

巴塞都玩《LINE》

《LINE》喺2011年開始運作，現時用戶已突破2億3千萬，雖然亞洲用家比例依然好高，但最估唔到原來西班牙嘅《LINE》Fans都達1,500萬人。連「地上最強」球會巴塞隆拿都有官方帳號同球星貼圖，在台上公布嘅貼圖竟然有美斯份，佢唔係邊踢波邊用緊另一個手機通訊軟件咩？

Pop-up Store掃貨

能得粉絲歡心，一來幾個角色熊大（Brown）、兔兔（Cony）、饅頭人（Moon）同詹姆士（James）人氣高企；二來世界各地都狂谷《LINE》電視廣告，例如香港就有大家熟悉嘅「始源」版本。今次發布會嘅全球傳媒總數約300間之多，現場設計咗好多影相位，有真人咁大嘅兔兔等做模特兒畀大家任影之外，仲起埋一個一天限定嘅Pop-up Store，由公仔、明信片、手機殼、文具、水杯、擺設、化妝袋等統統有得賣。

入場人士可以排隊玩幸運輪抽獎，可贏到可愛氣球等小禮品。	今年發布會於迪士尼樂園Maihama Amphitheater舉行。	會場舉行咗個「The Art of LINE」畫展。

超音鼠泡泡龍登場

發布會花咗唔少時間回顧這一年發展，如個人主頁、角色貼圖等增長同趨勢，但對於用家嚟講，更期待係有乜新嘢玩！如好多人都有玩嘅LINE Games，原來現時已有36款之多，最高下載次數分別為3,200萬次同2,500萬次嘅《LINE Pop》跟《LINE Bubble》，而5月底才推出嘅轉珠遊戲《LINE Pokopang》，唔夠3個月就錄得1,400萬次下載。開發商現場再公布11款將於秋季開始推出的新遊戲，連廠商TAITO、SEGA及Gameloft都助拳，泡泡龍《LINE Puzzle Bobble》、超音鼠《LINE Sonic Dash》同全民高爾夫《LINE Let's Golf!》將不日登場。

由《LINE》角色擔綱演出，見兔兔「怒睥」熊大介紹LINE Games。	唔少Fans都跟住《LINE》公仔擺出Chok樣！	網上商店 於LINE Web Store ，可上網買遊戲道具和貼圖。

新服務秋季殺到

《LINE》會喺秋季開始接連推出3項新服務，Video Call可以畀iPhone、Android手機及電腦互相作視像通話；LINE Mall玩法比較特別，讓用戶隨時隨地透過《LINE》出售及買入商品，雖然暫時未有詳細資料，但運作方式似乎跟拍賣網相似。至於LINE Music可利用《LINE》購買J-Pop、K-Pop等音樂，仲能夠跟好友分享已購買的音樂，功能吸引；但LINE Music背後所牽涉嘅問題較多，預計今年內只會先喺日本推出，其他地區嘅用戶未有得玩住。此外，LINE Web Store喺9月開始會在日本同台灣先行推出，可於網站利用信用卡、PayPal或預付卡，購買貼圖跟LINE Games付費道具等，唔使一定要喺App內購買。

日本方面，9月底會在3間便利店售賣《LINE》預付卡。	禮品中心 現場的Pop-up Store無時無刻都逼滿人，人氣爆燈。	兔兔跟BOSS Tee真係好Cute！
新款遊戲 由可愛角色擔正的賽跑遊戲《LINE Rainbow Chaser》，將於秋天推出。	超音鼠都玩《LINE》?原來係將會推出《LINE Sonic Dash》。	獨特貼圖 貼圖大受各地用家歡迎，如台灣就有「天台」版周董。

特派記者：布偉倫

鳴謝：LINE