9款新Games速試 GT6號召車手
$1,280就可以拎走PS Vita主機連遊戲套裝？只要喺電腦節使用大會消費券，每日喺PlayStation攤位嘅頭15名買家，即可以筍價買機！就算行遲咗都唔怕，展覽攤位另提供多種優惠，仲有9款新遊戲供試玩，譬如機迷期待已久嘅《Gran Turismo 6》（簡稱GT6）等，加上《Killer is Dead》製作人會喺星期日到場與機迷會面，十足十小型遊戲展！
$1,280入手PS Vita
PlayStation相隔一年再次參與電腦節，為配合大會力谷嘅現金消費券，佢哋都有激筍優惠，如用$50消費券加上攤位提供嘅10倍獎賞，每天頭15名買家便可以$1,280買PS Vita連遊戲套裝，勢必爭崩頭！不過就算以會場限定120部嘅優惠價$1,780購買PS Vita套裝，都比出面抵好多。至於限定50套嘅PS3 500GB主機連兩款遊戲《Gran Turismo 5 2013 Edition》及《God of War: Ascension》套裝，都比原價平近一成！
駕駛席戰意濃
《GT6》可說是今次遊戲試玩環節中最具號召力嘅一款，現場更設置專用駕駛座供機迷試玩！而試玩版完成度相當高，賽道及賽車都造得十分細緻，試玩主要是跟自己的Ghost Car作時間競賽，雖然競爭性一般，但能率先體驗這款未定推出日期嘅遊戲，必撐！其他供試玩的遊戲，包括PS Vita射擊遊戲《Killzone Mercenary》、由電腦遊戲移植到PS3的《Diablo III》等，Game迷萬勿錯過。
限量手錶送人偶
為配合將於9月初推出的PS3遊戲《Killer is Dead》中文版，遊戲製作人須田剛一將於8月25日（星期日）到場出席宣傳活動，屆時Jessica C.會化身成性感女主角Vivienne，記早啲入場霸位。若各位即場預訂指定遊戲，更有機會獲贈限定禮品，如訂《Killer is Dead》可得特別版杯墊及Keyboard護腕墊，訂《Killzone Mercenary》則可得到特別版匙扣及獨家下載內容卡，送完就冇啦。至於首10名購買《Splinter Cell: Blacklist》PS3手錶限量特別版的買家，更可得到遊戲主角Sam Fisher人偶一個。
撰文、部分攝影：布偉倫
網址：www.facebook.com/PlayStationHK