52倍變焦AZ521 身手鳥得

玻利維亞的烏尤尼鹽湖又稱為「天空之鏡」，但原來DC界都有「天空之鏡」，就係Kodak近日推出的AZ521。它擁有24mm廣角，不但影到遼闊天空，仲可以52倍Zoom至1,248mm，空中翱翔嘅雀鳥一樣捕捉得到，屬現時變焦能力最強的長炮DC，今次一於請生態專家Samson傳授大家「打雀」貼士。

售價：$2,480（設計圖片）

1,248mm影特寫

「打雀」基本上是以長焦距鏡頭去捕捉雀鳥動態，而AZ521擁有52倍Zoom長炮鏡頭，比市面上大多只有42~50倍變焦的Prosumer DC，無疑更上一層樓，由廣角端24mm伸展到1,248mm，拍攝公園中的小鳥絕對易如反掌。不過Zoom到咁遠，防震功能變得更重要，新機植入新光學防震技術，確保影像清晰穩定，如果怕手持打雀捕得耐會手震的話，外加腳架就最好喇。

濾鏡玩盡色彩

用得呢類長炮DC旨在「一機走天涯」，新機備有進階P、A、S、M曝光模式，還有場景模式、全景模式等，均可於機頂轉盤搵到，照顧到新手和進階用家需要。另外唔少得「罐頭」嘅濾鏡，新機有成18種咁多，等各位可玩盡各式獨特效果，當中值得一試具有異地風情嘅意式風格，有效令樹木變得翠綠，用嚟影雀鳥就最啱。規格方面，新機採用1,679萬像素CMOS，感光度最高達ISO 3,200，保證有足夠快門捕捉動態影像；還可拍攝1,080p全高清短片，另可玩埋VGA 120fps慢鏡攝錄，方便重溫雀鳥每一個細節動作。