韓國不但K-Pop同電子產品出色，線上遊戲亦屬全球首屈一指，如曾獲韓國遊戲大賞最高榮譽的《C9第九大陸》，便以華麗連招「響朵」，雖然這款MMOARPG登陸港台嘅時間較韓國慢3年多，但最緊要係好玩。由遊俠、戰士同薩滿引伸出各種二轉職業，既可使出華麗絕招，仲能亂入其他玩家的遊戲攪亂檔，這股韓風可以話係今個暑期中最強！
相比其他MMOARPG遊戲通常有5種以上職業選擇，《C9第九大陸》的角色設計冇咁複雜，初時只提供遊俠、戰士同薩滿3種職業。遊俠攻守力平均，擁有強勁的連續技；戰士擅長近身戰，可裝備武器同盾牌；而薩滿等同法師，能以魔法重擊對手。當角色升至25級時，便可進行職業二轉，每個職業都有多種轉職路線可揀，使技能大幅強化。以遊俠為例，二轉職業分別有裝備雙匕首的暗殺者、能使出機關槍式箭雨的神箭使，以及可設置不同陷阱兼變換屬性的潛伏者。到49級時，更可透過「覺醒技能」任務學得超強必殺技，在被激嬲的情況下使出一擊必殺絕技，出招畫面仲超級誇張。
雖然遊戲玩法都係於村莊接任務出征，但引入咗有趣嘅「亂入系統」跟「競技場PvP」玩法。透過「亂入系統」，玩家可隨機或以指定ID亂入其他玩家的任務，除了可以幫對方完成任務之外，亦可掉轉槍頭攪亂檔打低對方。至於「競技場PvP」可供16名玩家分兩隊對戰，當中接力賽以1對1方式，戰敗後由隊友補上，直至全部敗北為之玩完，較注重個人技巧；而死鬥賽則重視團體精神，以大亂鬥方式進行，可集體行動攻擊特定敵人。公會還可因應職業屬性強化「公會技能」，如會員屬性多是物理攻擊系的話，可選擇提升力量及體力技能，所以玩家要睇「公會技能」啱唔啱先至入會呀！
《C9第九大陸》喺3年幾前在韓國公測，便奪得當地最高遊戲榮譽「總統獎」，兼且得到「最佳遊戲音效獎」、「最佳遊戲畫面獎」、「最佳遊戲角色獎」同「優秀開發者獎」。在韓國及日本公測時，曾錄得逾6萬人及10萬人同時在線紀錄，勁有來頭！
類型：MMOARPG
開發：Webzen
代理：Gamania
平台：PC
網址：hk.beanfun.com/c9/
撰文：布偉倫