無論遊戲或電影，如果外星生物唔係神高神大周圍殺戮，邊度夠霸氣㗎！所以喺《地球防衞軍4》入面，外星生物都變晒做超巨型昆蟲同機械人，身為地球防衞軍嘅玩家，任務係見機械人就打、見蟲就殺，以城市和叢林做背景倍添刺激。而且新作在兵種和敵人有更多變化，仲可4人連線作戰，暑假必玩！
遊戲雖然叫做《地球防衞軍4》，但第3集已經係2006年嘅作品，或者好多玩家經已淡忘。今集故事設定喺2025年，原本上集被擊退嘅巨型生物兵團重回地球。為咗保護地球，抖咗幾年嘅地球防衞軍（Earth Defence Forces）又要再次出動，抵禦外星生物入侵，情節同前幾集差唔多。當中最吸引係追加咗4人連線協力模式，隊友有難時可以幫手救援，甚至可通過文字方式互相溝通。
全能部隊Fencer
新作又點少得新兵種，原本地球防衞軍已能用上擁有150種武器的陸戰特種部隊「Ranger」，以及從外星生物技術開發、備有飛翼的女性限定部隊「Wing Diver」。今集追加穿上重型護甲的二刀裝甲兵「Fencer」，佢既披上重甲及護盾，又備有火力強勁武器如格林機炮、手持加農炮等，作為新兵種嚟講勁有睇頭，可以話係攻守兼備的全能部隊。
地球防衞軍戰力提升的同時，外星生物亦有備而來，除了各式機械人之外，仲有超巨型昆蟲，例如巨蟻可利用下顎和強酸作為武器，畀佢咬一啖真係邊度都唔使去！而巨型蜘蛛會喺尾部吐絲，在高樓大廈之間築成蜘蛛網，唔小心畀蜘蛛網黐住會動彈不得兼扣能源。至於機械人都唔小嘢，好似原有嘅兩足機械人Hectors，可以雙手拎武器掃射；今集仲追加新型號，換上新裝甲可使出防護罩，比上集難打得多！
類型：動作射擊
開發：Sandlot
平台：PS3、Xbox 360
售價：約$400
查詢電話：2359 7998
撰文：布偉倫