6.3吋GALAXY Mega 睇波智強

最近足球盛事浪接浪，各國腳喺巴西踢完波，年輕小將又喺土耳其打得如火如荼，難得myTV有直播，加上on.cc詳盡波經分析，真係有今生冇來世！不過一般手機屏幕得4、5吋，連打字都有時會篤錯，試問又點樣睇波呢？計小記話不如用Samsung新機GALAXY Mega，它坐擁6.3吋怪獸級屏幕，球員大到連走位都睇得一清二楚！

售價︰$4,698

睇波猶如大電視

桂神話齋，踢波最緊要「當打、有活力、有身材」，估唔到Mega都有以上特質，由最當打的Samsung推出，內置1.7GHz雙核心處理器，撥頁、開Apps到睇片都勁有活力，絲毫唔窒。最正係有埋身材，在8mm苗條機身上，「僭建」出6.3吋屏幕，比同廠Note II嘅芒仲要大0.8吋，屬目前最大芒嘅4G行貨手機。小記試用它來觀看on.cc波經新聞片段及myTV足球賽事，雖然1,280×720解像度未算Sharp醒，但球員夠清楚，連黑媽媽嘅巴神都一眼認得出，帶出街睇波直頭好似睇大電視咁爽！

電池夠傾足1天

現代足球講求耐力，新機一啲都唔輸蝕，為方便大家長時間睇波煲劇，特別內置3,200mAh大電池，單睇數值已比一般手機鋰電池大了近一倍。根據廠方數字，用作2G通話時可講足一天，若閒置唔用的話，幾乎捱到一個月，夠晒襟用！電池夠大，儲存空間都有16GB，加上支援最高64GB microSD記憶卡，加埋共80GB，真係擺多幾套高清影片落去都掂。唯一要彈的是鏡頭僅有800萬像素，以高階機來說只屬勉強合格。

僅厚8mm，配合微彎機背，手感比想像好得多。

800萬像素鏡頭配有補光燈，拍攝規格只屬一般。

畫面分割玩到盡

「一個好嘅守門員可以令到場波由輸變和，由和變贏！」同樣地，一個好的操作系統一樣可以化腐朽為神奇。新機用上Android 4.2.2系統，並預載TouchWiz v4.0介面，不但提供7版首頁，還由GALAXY S4移植了Air View、Multi-Window等嶄新功能，前者可用手指懸浮在相簿及行事曆以預覽內容；後者則可把畫面一分為二，上下方各處理不同工作，用家可一邊Jot Notes一邊上網，又或者一邊畫畫一邊睇相，而且兩邊尺寸可任意調校，將6.3吋巨芒用到盡！