玻璃艇360度透視紅樹林

趁潮漲埋身睇

小記同Model今次約埋鹽田遊樂會負責人傑仔，在西貢一同搭街渡前往鹽田梓，約15分鐘船程期間傾吓偈、搽吓太陽油，一眨眼就過。到達碼頭行幾步路便到達鹽田遊樂會，取出今次嘅主角玻璃艇。傑仔話，潮漲最適合睇紅樹林，既可將玻璃艇划到水上植物旁邊，又可以在較矮的紅樹頂上划過。不過就算幾心急睇都好，落艇前都要先學習安全措施，而其握槳方法同玩獨木舟冇大分別，以雙手提槳，左手鎖實握緊船槳，右手靈活地畀力，梅花間竹地左右以約90度插入水中划，轉向時於反方向落槳，玩落冇太大難度。

15分鐘划入美景

相比起獨木舟，玻璃艇底部較為扁平，去水性一般，速度較慢。但從另一角度睇，可以慢慢享受與生態共處時間，更覺優哉游哉。小記與Model等一行數人從遊樂會旁的淺灘落水，向左方拐一個彎，大概花15分鐘便到達紅樹林區。只見水道兩旁布滿矮矮的紅樹，景致同西貢其他地方好唔同，而且四周非常寧靜，猶如進入了世外桃源一樣。沿途傑仔執起一支「筆」遞畀小記，原來呢支叫「水筆仔」，為紅樹植物果實，佢會在水中漂流到合適地點生根成長，認真神奇。更神奇嘅地方係只需向透明船底一望，便可見到矮紅樹和游過嘅魚仔，連村民所養嘅狗仔都唔抵得，落水游埋嚟一齊玩！

喺玻璃艇船底可見到紅樹植物，甚至有魚仔游過！	唔係真筆嚟o架！佢係紅樹植物嘅果實「水筆仔」。	點解玻璃艇船頭船尾都縛住個「Wilson」？唔通要留畀湯漢斯解悶？原來作用係遇上反艇都唔怕沉喎。

潮退睇彈塗魚

潮漲時可以親近紅樹林，若遇上潮退有乜嘢睇？傑仔話泥灘可見到彈塗魚同招潮蟹。前者係一種識彈跳爬行的魚仔，外貌都幾得意；而招潮蟹隱身於泥灘小洞中，出面未必見得到。至於幾時會潮漲同潮退？其實瀏覽天文台網頁（www.hko.gov.hk）便可知道，傑仔話無論潮漲或潮退都有唔同生態，係西貢區最大優點。

落艇前先學習落槳方法，為安全計，建議玩時着上救生衣。	唔太識轉向嘅模特兒有時直衝紅樹，但撞落去都好安全。	鹽田遊樂會位於碼頭旁邊，非常易認。

點解叫紅樹林？

紅樹林嘅都係綠色植物，點解有個「紅」字？原來紅樹植物含大量單寧，當被氧化後枝幹便呈褐紅色，樹皮更可提煉成紅色染料。

紅樹林地區都幾廣闊，沿途可認識各類植物。

街渡服務位於西貢公眾碼頭旁洪記海鮮酒家對出位置。

鹽田梓交通

鹽田梓離西貢市中心其實不遠，從西貢公眾碼頭乘街渡前往只需約15分鐘。不過要注意街渡服務只限星期六、日及公眾假期，去程由10:00am至3:00pm，每小時一班，回程則提供12:20pm、2:20pm、4:00pm及5:00pm四班，來回收費每人約$35，入去玩時要注意！如果平日想入鹽田梓的話，可自行聯絡艇家，單程船費約$80（8人或以下）。

查詢電話：2791 6226

組團活動

內 容：8~10人（８歲或以上）一團，由教練帶隊划玻璃艇遊紅樹林，兼製作及享用竹筒飯，包街渡船費及保險費用。

費　　用：$385/人（推廣優惠）

查詢電話：9200 0174

網 址：www.skparadise.com

撰文：布偉倫

攝影：林資凱

模特兒：Paris（Pure Models）