沙灘水戰變奏 喪玩Running Man

Game1：水槍問答

綜藝節目經常會見到問答遊戲，今次沙灘變奏版雖然同樣分成兩隊進行，但答錯的話即時會被水槍喪射。想增加刺激感，最好限定答題嘅兩位成員係同一性別，如果兩位女仔，就問有關足球術語等問題；如果兩位男仔，就問化妝或名牌知識，答錯嘅機會自然大增，隊員99%變成「落湯雞」，仲可以學《Running Man》扮成Avengers角色，搞笑之餘夠消暑！

玩法：每隊輪流答問題，如A隊負責問題目時，B隊員等「受靶」，建議搵多幾個人負責射水！
人數：4人或以上
刺激度：★★★★（以５★為滿分）

想好似《Running Man》玩主題都有計，可戴番個Avengers面具（售價：$99.9/各）。（a）

NERF Super Soaker系列水槍Shotwave Blaster可更換彈匣（售價：$179.9/左）；Scatter Blast嘅水柱能一分為五（售價：$119.9/右）。（b）

電視節目有水炮「招呼」參賽者，睇見都涼快！	Model試跳試咗好多次先成功，而道具有繩子（售價：約$30）和蛙鞋（售價：約$150）。（c）	事先喺背脊貼上名字，再在浮床爬去對方身邊撕甩名牌。

Game2：蛙鞋跳繩

夏天去到沙灘，最啱係出番一身汗，早前《Running Man》喺韓國水上樂園大玩接力賽，其中一個遊戲係蛙鞋跳繩。一般跳繩可說輕而易舉，但加埋對超大隻蛙鞋後，難度即時提升；皆因玩家要留意扔繩子嘅幅度，避免繞到蛙鞋蹼面，另外着住蛙鞋喺沙地上跳，零舍花氣力，一於分兩組於限時內接力鬥跳，輸咗要接受水槍大懲罰！

玩法：於1分鐘限時內每隊鬥跳得多；另外亦可以兩人一組改玩蛙鞋跳大繩，難度更高。
人數：2人或以上
刺激度：★★★

Game3：浮床捉迷藏

要數《Running Man》最經典嘅遊戲，「捉迷藏撕名牌」一定走唔甩，今次來到沙灘梗係要變成濕身落水版。玩法好簡單，首先喺各人背脊貼上名牌；然後瞓喺浮床落水，喺指定範圍內鬥快將對手嘅名牌撕甩，咁就可以將佢踢出局。本身喺浮床上移動已經唔易，依家要伸手撕對方名牌就更難，但為求做贏家，潑水、拉衫呢啲招數又點少得？

玩法：瞓喺浮床鬥快將對手背脊嘅名牌撕甩就算贏。建議喺淺水地方玩較為安全。

人數：2人或以上

刺激度：★★★★★

《Running Man》搞邊科？

《Running Man》係韓國SBS電視台的綜藝節目，由2010年7月11日首播至今，已推出逾150集，每集由劉在石、金鐘國、Haha、Gary、池石鎮、李光洙、宋智孝7位成員，邀請不同嘉賓進行比賽，當中以捉迷藏撕名牌遊戲最受歡迎。每集會加入不同主題，好似早前玩《復仇者聯盟》Cosplay，勁搞笑。當中金鐘國、Gary、Haha及池石鎮將於下月13日嚟香港，粉絲一定要撐場！

撰文：林子聰　

部分攝影︰陳富權

模特兒︰Hillary L.（Unique Model）、Gloria C.

查詢電話：（a）2991 6222、（b）2738 8300、（c）2384 0277