洛杉磯E3直擊 Xbox One斬兵鋸屍靚得誇
Microsoft等到洛杉磯E3遊戲展開幕時，才喺會場擺部Xbox One真機出嚟，夠晒話題性！小記當然第一時間試玩，而多款獨佔大作傾巢而出，好似有得扮羅馬帝國將軍上場殺敵的《Ryse: Son of Rome》、能駕駛機械人作戰的《Titanfall》、單槍匹馬力敵過百喪屍的《Dead Rising 3》，以及成架McLaren P1跑車擺上台的《Forza Motorsport 5》，全部都靚得誇張！
體驗手掣震動效果
萬眾期待的Xbox One終於現真身，整套系統包括一部內置500GB硬碟的遊戲主機、新款Kinect感應器和無線手掣，還為新會員提供14天Xbox LIVE金會員資格。主機最特別是用上兩種不同質感外殼及Blu-ray碟槽，連帶無線手掣亦換上新Look，A、B、X及Y掣標示更明顯外，還配備新震動設計Trigger鍵（LT／RT），可跟內置震動器產生兩種不同震法，現場更設有專櫃畀大家體驗其獨特震動效果。
預計11月推出
好多玩家都關心Xbox One賣幾錢，Microsoft在E3展前發布會正式揭盅！今年11月起於全球21個市場推出，北美區定價499.99美元，歐洲區定價499歐元，而英國定價429英鎊。至於香港會否是首輪賣街的地區，暫時仲未知，相比Sony剛公布PS4主機售價399美元，Xbox One看似較貴，但其實它已附上新版Kinect，可以玩盡體感遊戲及新操作體驗，計落價錢相差不遠。
《Ryse: Son of Rome》羅馬士兵激戰
在眾多獨佔遊戲中，小記覺得最有霸氣要數這款以羅馬帝國為背景的動作遊戲《Ryse: Son of Rome》。玩家要扮演羅馬將軍Marius帶兵出戰，現場試玩版由搶灘戰開始，拎起長劍加盾牌上陣殺敵，埋身血戰時更會變成QTE模式，睇準時機跟畫面指示撳掣，便可以各式各樣手法了結對手，譬如向頸後刺刀、用腳踩面等，真實感十足，原來遊戲由《Crysis》系列製作團隊Crytek開發，難怪畫面咁靚啦！
推出日期：2013年尾
《Forza Motorsport 5》麥拿侖戰車坐鎮
《Forza Motorsport》系列雖然差不多每隔兩年就有新一集推出，但每次都有驚喜，如《Forza Motorsport 5》用上1,080p加每秒60格畫面展示，像真度極高！廠方仲將成架McLaren P1戰車擺喺E3會場作宣傳。值得一提，今集遊戲會透過Drivatar Technology學習玩家嘅駕駛行為，令賽道上每個對手都更人性化，似同真人鬥車多過同電腦對戰咁話！推出日期：2013年尾
《Dead Rising 3》隻身力敵喪屍
前兩集《Dead Rising》都係Xbox獨佔，到第3集當然唔例外。上集玩家可隨手拎起物件，組合出各種武器打喪屍，今集玩得更激，好似用電鋸不但可當面鋸喪屍，仲能擲出飛鋸將遠處喪屍劈開兩截！而且新作在主機強化下，同一畫面可出現大量唔同攻擊動作嘅喪屍，小記試玩時粗略估計，同一畫面有幾百隻喪屍撲埋嚟，場面相當誇張。推出日期：2013年尾
《Titanfall》擊倒Titan機械人
在發布會壓軸登場的《Titanfall》，雖然E3會場未有得試玩，但小記從閉門演示中，見識到新作別具一格的玩法，玩家除了可騎乘幾米高嘅機械人，操控途中甚至可彈出機艙，爬到敵方機械人身上搞破壞，比一般射擊遊戲只係鬥槍法更有趣。
推出日期：2014年春季
同場加映：《Halo》新作神秘現身
Microsoft又點會唔預《Halo》呢？發布會播出一段《Halo Xbox One》（暫名）預告片，片中見主角笠起斗篷在沙漠行動，最後一抬頭先知係Master Chief！遊戲暫定2014年登場。
特派記者：布偉倫
鳴謝：Xbox