美國WWDC直擊！ iOS 7換面搶鏡

今年WWDC（Apple全球開發商大會）終於以iOS 7帶來突破，在格仔Icons擺法外，加入全新設計介面，由相簿等圖示，以至快速開關工具嘅Control Center，以及無線分享相片嘅AirDrop都改頭換面，十足玩緊部新嘅iPhone咁過癮！

10大新功能

今年WWDC照舊喺三藩市Moscone West會場舉行，奇在Keynote未開始前，會場多處已掛上「7」字Banner，唔少人都預計會發布iOS 7。第一眼望見新iOS主頁時，會發現大部分圖示經過重新勾畫，仲加入畫面過場效果、半透明鍵盤等細節，比舊介面更簡約。除咗外觀改變，新教主Tim Cook一開始已講明iOS 7有10項重點功能，當中小記最鍾意係Control Center和新版Safari，前者為快捷功能中心，用家喺畫面嘅底部向上一掃便會彈出，可作開關Wi-Fi、播放音樂等設定，以後唔使次次入「設定」慢慢Set；後者則換了新版面，開啟書籤、切換分頁更就手，仲支援全屏幕顯示，功能齊全。

現場花絮 Tim Cook話今年WWDC門票71秒就賣晒，每張要1,599美元呢！

照舊喺Moscone West會場舉行，大大個Logo勁易認。

iTunes Radio港暫無緣

其他功能都好有睇頭，包括設有畫面縮圖嘅MultiTasking、新增1:1比例及即時濾鏡嘅拍攝功能、以時間和活動分類嘅相簿、換咗新聲嘅Siri語音工具、將iOS融入車廂系統、自動更新程式嘅改版App Store等。不得不提iOS 7將OS X嘅AirDrop功能全面移植，流動裝置只要處於同一Wi-Fi網絡，毋須任何設定便可互相分享相片、影片及聯絡人資訊！全新串流音樂服務iTunes Radio都獲現場人士拍爛手掌，用家可自訂喜愛歌曲類型之餘，仲可直接喺iTunes Radio下載音樂，可惜服務暫時只適用於美國。此外，大家唔使擔心兼容問題，皆因iPhone 4、iPad 2、第5代iPod touch打後嘅機款統統都可更新至iOS 7，廠方表示大概今年9月後便會推出，好快就有得玩！

現場用玻璃罩展出新一代Mac Pro，最特別係採用子彈外形。	iOS 7預覽 大會一開始將iOS 7的10個新功能Show畀各位睇。。	由畫面底部向上一掃便會彈出Control Center，電筒、計算機等功能有齊晒。

12小時長氣MacBook Air

記得上年WWDC畀部Retina Display嘅MacBook Pro搶晒鏡，今年主角轉為MacBook Air。新機無論外觀和重量都與上代相若，但硬件換上Intel Haswell處理器，最大特點係慳電，廠方表示11吋MacBook Air續航力達9小時，而13吋更加可以用足12小時，啱晒小記呢類經常拎電腦出街嘅用家！而且呢部「長氣袋」已經上架，11吋及13吋的售價分別由$7,688及$8,488起，價格極有競爭力。

相片可用地點、活動、年份作分類，擺相更有條理。	雖然iTunes Radio香港用唔到，但玩法吸引兼可下載音樂，有能力打低對手	OS X Mavericks新增Tags分類功能，搵檔案更容易。

OS X Mavericks功能手機化

手機軟件有咁多Update，電腦方面當然唔可以輸蝕，廠方便發布新一代OS X Mavericks。系統加入唔少手機元素，好似電子書iBooks、地圖Maps、日曆Calendar、通知欄Notifications等，均由iOS移植過來。另增設Finder Tabs及Tags功能，前者喺搜尋欄加設分頁，Drag檔案去其他資料夾直接得多；後者則可替任何檔案加設標籤，將檔案有系統地分類，慳番好多搜尋時間。

新版Safari將Bookmarks、Reading List等加以整合。	連Maps入面嘅3D實境圖都有齊，仲可將路線Share畀iPhone！	Daniel Rice

開發者有Say

年僅15歲的App開發者Daniel Rice：「最驚喜係MacBook Air備有12小時電量，另外好鍾意iOS 7嘅新介面！」

特派記者：林子聰

查詢電話：800 908 988

鳴謝：Apple