又係Tecmo Koei發行夾Omega-Force開發，難道又一隻新「無雙」？這個班底今次在《討鬼傳》搞搞新意思，唔再單槍匹馬亂劈，而係聯合4位玩家去獵鬼，難怪坊間話佢係「芒亨」加「鬼武者」混合體。講到最特別係斬甩咗巨鬼嘅手手腳腳後，要施法超度使佢不能重生，感覺勁新鮮！
就算玩法唔再「無雙」，但新作風格依然好「Koei」，玩家扮演專門討伐鬼怪嘅新手武士，穿越時空從日本古代打到幕末時代，非常大和Feel。而遊戲打嘅鬼並唔係虛體，備有各式各樣古怪造型，由嘍囉的小型鬼，到幾個人咁高嘅Boss都有，還可與好友集4人之力獵鬼，感覺夠晒「芒亨」。
但唔係搵齊人打大佬就搞掂，玩家喺遊戲一定要使出部位攻擊才能斬殺大佬。所謂部位攻擊係先要不斷攻擊，將Boss嘅魂魄逼出表面，這時Boss會進入「禍靈化」，可乘勢斬甩其軀幹。最有趣係軀幹會在一定時間後重生，到時又要從頭嚟過，除非玩家使出「光之陣」將甩掉嘅軀幹超度。要留意Boss受重傷後，會進入「蝕魂」殘暴狀態，記得避開暴走攻擊。
貫穿遊戲嘅係魂魄，好似上文話超度軀幹可去除惡靈，但其實魂魄都有特殊用途，如斬甩Boss軀幹後所釋放嘅魂魄，可附喺武器之上提升戰鬥力！如儲滿魂魄計，玩家更可發動「鬼之眼」透視Boss嘅生命力；又或者發動「鬼千切」短時間內爆Seed，將鬼怪一拳打低。《討鬼傳》的4人近距離連線玩法，不但適用於PS Vita，玩家亦可將下載版裝落PSP，即是說可以PS Vita跟PSP連線一齊玩；但想上網同其他玩家組隊，就一定要用PS Vita先得。
類 型：狩獵動作
開 發：Omega-Force
平 台：PS Vita、PSP
推出日期：6月27日
售 價：$388（PS Vita及下載版）
查詢電話：2341 2356
若玩家未買機都唔怕，可考慮《討鬼傳》遊戲連PS Vita主機同綑裝，其機背加入傳統繪製標誌及水墨「鬼」圖案，和風味濃得來幾有氣勢。
售價：$2,380
撰文：布偉倫