應節龍舟濕身前哨戰

過兩天便是端午節，可以食糉應節外，當然唔少得欣賞緊張刺激的龍舟賽事。不過淨係睇人比賽又點夠喉，若然可以約埋大班老友，齊齊落水扒龍舟就更過癮。一於請挑戰龍龍舟隊教練馬觀生（馬Sir）帶大家入西貢玩龍舟，濕身感受扒龍舟樂趣。

打破傳統男女混槳

擁有超過20年教授龍舟經驗的馬Sir，曾教過香港醫學會、社會福利署等團體，仲係2008年京奧香港火炬手之一。而扒龍舟屬中國傳統活動，自然有好多大家估唔到嘅習俗和禁忌，馬Sir稱：「從前扒龍舟是男士活動，女士不但唔可以上艇扒龍舟，甚至連摸吓都唔得，而大肚婆更是禁止觀看龍舟賽事，如果划手的老婆懷孕一樣唔可以落場，以避免相沖。」不過隨着社會開放，起初有專畀女仔扒嘅鳳艇，今時今日已沒有明確分開，鳳艇亦逐漸被淘汰。「現時龍舟競賽中有不少男女混合賽事，男女甚至會一齊扒，而中龍賽事至少要有8個女仔，小龍賽事則至少有4個女仔，部署上會將女划手放在較中間位置。」

新物料取代木材

可能唔少人認為，今時今日的龍舟還保留着傳統木製工藝，但原來近年木製龍舟已漸漸被纖維製龍舟取代，而划手的木槳更演化成纖維槳或碳纖槳，馬Sir表示：「相比木製龍舟，纖維製龍舟不但保養簡單，而且較易打理，拎上水曬乾即可；至於碳纖槳的優點是比木槳輕一半，大約350g左右，加上其柔韌性高，容易發力又慳力，對長途比賽較有着數，所以現時國際賽都幾乎用晒碳纖槳，只有部分地區賽仍規定使用木槳。」雖然裝備有助提升速度，但姿勢正確與否才是關鍵。「起手時身體要向前傾，下手保持伸直，而上手呈90度角，槳入水的角度約為70度，划動時利用手、腰和腳力將身體坐直，為標準的扒龍舟動作。」

動作示範<br>舵手<br>作為艇尾的舵手，要控制方向和觀察動向，仲要用身體壓住艇尾穩定龍舟。

動作示範
舵手
作為艇尾的舵手，要控制方向和觀察動向，仲要用身體壓住艇尾穩定龍舟。

划手<br>標準的扒龍舟動作，起手時應下手伸直，上手呈90度角，槳入水大約呈70度角。最重要是划動時手、腰和腳齊齊發力，而用力時謹記呼氣。

划手
標準的扒龍舟動作，起手時應下手伸直，上手呈90度角，槳入水大約呈70度角。最重要是划動時手、腰和腳齊齊發力，而用力時謹記呼氣。

一般練習用的龍舟都唔會裝上龍頭、龍尾及龍舟鼓，以免練習時意外損壞。

舵手屬關鍵人物

大家別以為龍舟淨係得一個Size，其實有分為大、中、小龍3種，分別可乘坐48名、20名和10名划手，馬Sir解釋：「現時龍舟競賽大多採用中龍（標準龍），不過香港仔仍然有大龍比賽，而大龍保留木製的傳統特色，相當少見。」龍舟上的崗位有鼓手、划手及舵手，鼓手的作用是畀拍子和激勵士氣，划手當然係推動龍舟前進，而舵手則控制艇身以保持航道垂直。「唔好以為舵手淨係企喺度，其實佢嘅職責先至最重要，不但要控制方向，仲要觀察動向隨機應變，甚至用體重壓着艇身提高穩定性。」扒龍舟策略上普遍以30槳起步，務求早佔先機帶頭，能夠成功突圍士氣都唔同啲。