台北直擊！VAIO Duo 13滑動「筆」加索

當各大電腦廠在Computex狂騷新機之時，Sony喺台北另一邊大搞VAIO發布會，推出功能多多的13.3吋滑動設計VAIO Duo 13，以及同級最輕的VAIO Pro 13/11手提電腦，幾有「打對台」意味！當然新機有唔少殺着，如VAIO Duo 13配上Intel第4代Core i（Haswell）處理器，仲追加數碼觸控筆玩Apps，一機可玩足15小時！

售價︰$17,980（Core i7）
$12,980（Core i5）

平板變電腦體驗

今次VAIO發布會屬全球活動，除台灣媒體之外，仲有來自香港、新加坡、泰國、中國同歐美等地傳媒參加，總計有近200位咁多。其實早於上星期，VAIO Duo 13在網上已有相片流出，不過睇相同真正拎上手玩係兩回事。新機採用Surf Slider滑動設計，只要在平板狀態將屏幕向上稍微抽起一推，便可變身成Ultrabook，Sony日本高層話佢係一部「Always PC, Always Tablet」產品，至於其他二合一變形產品只係「Sometimes PC, Sometimes Tablet」產品，箇中意思大家應該收到啦！

15小時最長氣

VAIO Duo 13採用新一代Core i處理器，這顆新CPU其中一個好處係慳電，令操作時間提升到15小時咁長，大半天唔充電都夠玩！台上Sony高層話業界有好多測試電量標準，每個測試嘅時間都有少少出入，但佢話截至現時為止，新機喺任何一個電量測試中都係第一！操作夠長氣之餘，還內置創新待機技術，當Ultrabook處於待機狀態時，一樣可上網更新應用程式同接收電郵，而且由休眠到着機只需少於1秒時間，好似玩平板咁方便。

VAIO Duo 13分別有Core i7及i5版本，機身有黑、白兩色任揀，外形勁索！

VAIO Duo 13分別有Core i7及i5版本，機身有黑、白兩色任揀，外形勁索！

備有網絡轉接器，插入LAN線即可變成Wi-Fi，充當旅行Router使用。

數碼觸控筆玩Apps

雖然新機注重實用性，但聲畫娛樂都冇忽略到，除咗加入ClearAudio+強化音效外，仲搭載能顯示更廣闊色域的TRILUMINOS Display技術，加上13.3吋屏幕解像度達全高清級數，實試睇片效果勁靚！廠方亦有喺Win 8格仔介面追加自家Apps，仲可配埋數碼觸控筆使用，好似喺《Note Anytime for VAIO》入面，可用數碼觸控筆畫畫同寫字，並且可隨時以「Active Clip」使用儲存於電腦內的圖片；而當使用《CamScanner》將機背鏡頭當成掃描器時，只需以數碼觸控筆拉動影像四角，便可將變形的文件拉回原來模樣，使用時勁方便。