被冠以「松露女王」的朋友Esther，一手一腳開設意大利廚房Donna Dolce，早前舉行周末市集，出售從法國、意大利及歐洲等國家進口的火腿、芝士、意粉、醃菜和水果，以及自家製作的糕點、麵包、果醬、餡批及杏仁糖，場面非常熱鬧，口碑十分良好……當然，風光背後充滿血汗和淚水，女王與一班朝臣婢女晚晚做到三更夜半，努力與收入根本不成正比，但計較的人就不會做出好水準。
開賣之前，除了要努力烹調，還要為定價煩惱，例如紅酒煮鮮無花果果醬，完全是手工製品，每罐均採用10多粒鮮無花果，Esther貴為「松露女王」，卻是定價白癡，竟然想定價$60一罐！我說：「1粒鮮無花果零售價都要$10，一罐無花果醬點可以賣$60？你太平邊個信你用咗真材實料？市面上賣嘅工業果醬，聽講只係得少少真果肉，其餘都係冇味嘅瓜蓉再加埋一堆糖分同添加劑，假嘅都賣幾十蚊，你又走去賣幾十蚊？」
我一輪嘴說了大條道理，結果開賣時定價$80，賣了大半天減為$68，Esther說：「大家商量過，都係驚人哋嫌貴，咪寧願要錢唔要貨。」唉，只怪顧客不識貨。
價錢像o靚模身材，永遠鬼影變幻，同一東西，無名氣便一文不值，有名氣就一夜跳升。價值卻是來自事物本身，與別人的目光、外界的判斷無關。今日身價不高的朋友，請不要氣餒，不要看扁自己的價值。
網址：www.chan-wai.com