The Last of Us 絞腦汁真逃亡
求生遊戲《The Last of Us》可說是今年年中期待度最高嘅遊戲，玩家要控制男主角帶住o靚妹，在滿布喪屍嘅美國廢墟逃亡，講牌面已經吸引！想體驗遊戲嘅氣氛除咗用手掣外，仲可同埋幾個老友親身上陣，皆因PlayStation與「逃出香港」喺6月大搞《The Last of Us》主題密室，既像打機時要絞盡腦汁，仲會隨時被嚇餐飽！
6月限定主題密室
《The Last of Us》（中譯：最後生還者）遊戲將於6月14日開賣，但呢間「逃出香港」主題密室喺6月1日就有得玩，仲要限定喺尖沙咀新店！要將遊戲元素擺落密室設計一啲都唔易，例如有個謎題要睇住遊戲畫面先有頭緒，至於當中Tricky位小記就唔穿橋啦。「逃出香港」方面表示，密室有4級難度，限時45分鐘完成。
如各位想玩的話，記得上「逃出香港」網站預約，亦可登入PlayStation HK facebook參加遊戲，有機會贏取免費VIP體驗券。
掟啤酒樽呃喪屍
講番呢隻年中遊戲大作，背景設定於喪屍瘟疫發生後20年，當時人類死得七七八八，而仍然生還嘅人類就各懷鬼胎爭奪資源。新作唔會好似同類喪屍Games要玩家亂咁射，因為遊戲內嘅彈藥有限，最佳逃生方法係「避」！喪屍大致可分為兩類，當中Runner鍾意聯群結黨出擊，蟻多摟死象；至於塊面爛晒只剩聽覺嘅Clicker就攻擊力超強。與其硬碰硬，遊戲鼓勵玩家諗計去避開喪屍，好似向遠處掟啤酒樽將Clicker引開，再拔足逃走！
合成道具多諗頭
遊戲雖然只可以控制男主角Joel，但喺危急關頭o靚妹Ellie都會出手相助，要花好多腦汁先至能夠逃出生天，例如喺試玩版要逃出鐵絲網去另一邊就勁考腦筋，原來要走到山邊執埋長木板，再將佢帶上屋頂搭橋鋪路。道具方面亦要花心思去合成，例如治療包要用酒精同碎布製作，刀仔要用鉸剪同膠紙去組合，呢啲都算簡單，各位愈玩會發現愈多關要用到不同合成道具，少啲耐性同諗頭都幾難成功逃生！
DETAILS
類型：動作求生
開發：Naughty Dog
平台：PS3
推出日期：6月14日
售價：$388（鐵盒珍藏版）、
$528（迷你插畫集特典版）、
$1,288（情景模型典藏版）
查詢電話：2341 2356
撰文、部分攝影：布偉倫