5吋靚芒Vega IRON 飛邊更Slim

「夥計，一件蛋治飛邊！」麵包要飛邊就話咁易，如果手機飛邊又有冇難度呢？韓國第三大手機廠Pantech的2013年旗艦作Vega IRON，玩盡飛邊概念，機身左右邊框只得2.4mm，望落好似冇邊咁誇張。而且5吋屏幕用咗In-Cell Display技術，清晰度零舍高，用嚟隨街煲《Running Man》就最啱！

售價：$5,380

2.4mm幼邊搶眼

傳統手機屏幕總會有粗粗嘅邊框，估唔到新機竟然可以喺呢方面玩突破，特別將左右兩條邊縮小至2.4mm，令屏幕佔機面嘅總面積提升至75.5%。新設計除咗有型之外，仲間接令機身更Slim，拍埋同樣5吋芒嘅Xperia Z，明顯短啲和窄啲，單手拎機都輕鬆得多。值得一提，屏幕特別用上In-Cell Display新技術，據廠方表示，可大幅提升屏幕清晰度，小記實試睇片時，無論色準和細緻度都非常高，如果解像度由720p升級至1,080p就仲好！

一體金屬設計

近期唔少手機如HTC One等都大玩金屬元素，Vega IRON都唔執輸，植入一體金屬邊框設計，感覺有啲似Bumper保護套；而且邊框表面加入髮絲紋，連電源鍵及音量鍵都一併換上金屬物料，做工精細。此外，機身右上角驟眼睇好似有個細孔，實情內藏7色LED提示燈，來電、充電等情況下都會着燈，相當有心思。

純白機背玩斜切概念，果然有心思。

跟機附有兩枚2,150mAh電池，外形勁似香口膠。

支援4G制式

作為旗艦機款，廠方喺韓國搵嚟李秉憲拍宣傳片。咁受重視，機能當然唔失禮，搭載1.7GHz四核心處理器、2GB RAM及1,300萬像素鏡頭頂級規格，而且仲對應最新802.11ac標準，方便以極速無線上網；最正係今次由水路到港嘅SK Telecom版仲支援1800MHz頻譜，喺香港都可用到4G制式，上網、串流更爽。軟件方面，新機採用Android 4.1.2作業系統，仲特別喺介面搞花臣，其中以「mini Window」最過癮，音樂播放器、計算機、撥號鍵盤等功能都可以喺畫面以小視窗使用，視窗數量仲冇限制添！