Elitebook Revolve 810 1.4kg輕薄扭芒

扭芒筆電並非新鮮事，但在視窗及軟件欠缺支援下，只可嘆一句「生不逢時」，直至強化觸控介面的《Windows 8》系統誕生，各大廠商紛紛加推新機，連HP都落重本打造旗艦級EliteBook Revolve 810，11.6吋芒不但可水平及垂直180度扭動，更可選配Core i5處理器及3G網絡功能，機身重量只得1.4kg，扭芒都可以扭得好輕鬆。

售價：$12,800（Core i5版）、$13,800（Core i5加3G版）

輕身又硬淨

HP早期的商務機款已備有扭芒設計，但好似EliteBook Revolve 810咁輕薄卻是罕見，機身計埋鍵盤同屏幕都只得22.2mm咁薄，重量僅1.4kg。最重要係冇因為遷就輕薄機身而影響堅固耐用度，植入全鎂外殼及11.6吋Corning Gorilla強化玻璃屏幕，符合MIL-STD-810G美國軍用規格，可以抵禦震盪、沙塵、溫差等情況，姑勿論有冇咁嘅需要，平常使用定必更加安心。硬體規格則可選用Core i5-3437U 1.9GHz處理器及128GB SSD，整體效能毋庸置疑。

擴充介面齊全

除了觸控扭芒夠實用之外，新機同時具有可換電設計，電池本身已有8小時續航力，遇着冇電時一換搞掂，省卻不少麻煩。而大多廠商為了偷薄機身，都會喺擴充介面做手腳，例如轉用細頭或減省插頭等，新機有齊USB 3.0、DisplayPort和LAN，甚至可選配3G上網。若果都唔夠用的話，還可另購EliteBook系列專用底座Docking Station，只要駁上屏幕、鍵盤和滑鼠，充當桌面電腦使用都冇問題。

「展示模式」可以座枱調校角度，睇戲時更輕鬆。

摺疊成「平板模式」後，方便用家邊行邊篤芒。

預載實用軟件

新機最有趣的地方，是跟機預載《Windows 7》系統，卻附有《Windows 8》升級序號，讓用家可於兩個系統中選擇，相當貼心。而機身預載《HP Software Setup》實用軟件，可輔助用家下載或升級程式，當中包括《CyberLink Media Suite》多媒體應用、《Evernote》文書工具等。其他軟件方面，有分享流動上網的《HP Wireless Hotspot》及將文件影像修正的《HP PageLift》，加上機身可支援Wi-Fi、NFC、3G等，流動使用時更得心應手。