超人隻揪蝙蝠俠？唔係電影橋段，而係由一眾DC英雄擔正嘅格鬥遊戲《Injustice: Gods Among Us》！除咗有齊綠燈俠、神奇女俠、閃電俠等耳熟能詳嘅角色畀玩家揀之外，場景仲可以同角色互動，打穿牆時有機會跌出特殊道具。嫌屋企打機唔夠喉的話，仲可以夾埋早前推出嘅同名手機App玩連動，畀大家隨時同英雄過招！
點解有咁多DC英雄開戰？故事講超人的最愛被殺，遂以武力解決問題，結果有唔少英雄撐佢，而蝙蝠俠便組成另一批英雄對抗。雖然內容牽強咗少少，但有二三十個英雄角色聚首一堂打餐飽，自然更加過癮。新作由《Mortal Kombat》（真人快打）團隊於背後設計，不僅將角色做到靚靚仔仔，每個角色的招式、場景以至遊戲平衡性都做得一絲不苟，唔少玩家都讚呢隻遊戲好玩過《Mortal Kombat》添。
人物多、設計又吸引，但唔係每位英雄都好似超人咁勁，如小丑呢啲陰濕角色又點夠打呢？其實開發商設計遊戲時已諗過度過，務求令角色的能力得以平衡，如小丑冇實戰能力，但可周圍放炸彈兼放火，蝙蝠俠則可用上各種自家武器，閃電俠就以快招取勝，神奇女俠可用長劍和盾牌等，總之每個角色都有唔同專長。出「超必」時，場面仲誇張，超人會一拳將對方打出大氣層施以重擊，閃電俠會用光速圍繞地球一圈出招，勁有電影感！
抵讚嘅仲有場景設計，唔少格鬥遊戲嘅背景只得一塊布景板，但新作完全唔同，玩家出招時可打爛景物，還可拎起破爛物件進行攻擊，甚至執起從場景跌出嚟嘅道具如手榴彈炸對手，或者以場景嘅高壓電線電對手。玩開格鬥Games都知，有時被逼埋牆角硬食絕招都幾無奈，不過喺呢隻遊戲嘅牆角不時有紅色按鈕出現，玩家可以憑此觸動機關反攻對方。究竟邊個英雄勁啲？真係要打到最後先知！
類型：格鬥
開：NetherRealm Studios
平台：PS3、Xbox 360
售價：$380
查詢電話：2359 7998
廠方於月初搶先推出同名手機App《Injustice: Gods Among Us》，玩法是收集英雄角色卡牌進行3對3戰鬥，最重要係免費下載，而且手機版同家用版備有連動功能，如手機版解鎖後的物件，可以喺家用版使用。
撰文：布偉倫