星空獵人 攝遊世界
唔少人以為有部相機，得閒影吓Model就自詡為攝影師，到頭來只不過落得「龍友」之名。要人關注你嘅作品唔一定影o靚模，喺香港影吓風景一樣可以爆Like。好似早前於網上瘋傳的大東山星空夜景，拍攝者Will Cho冇任何重型攝影裝備，單憑一部無反細機、一支腳架，便拍出壯麗的銀河景色，旋即受到多間大公司邀約合作，名副其實一「夜」成名。
製作自己的標記
羅馬非一日建成，高手亦唔係一夜煉成。Will同好多攝影初哥一樣，平時以DC影Snapshot為主，有次無意中看到朋友相片，發現香港原來都可以影到好靚嘅日出和雲海，才開始涉足風景題材。他表示：「當時用嘅DC冇慢快門，滿足唔到我嘅拍攝需要，所以便換咗部Sony NEX無反細機，再參考朋友和外國作品反覆練習，大概用了１年時間才掌握到星空拍攝技巧。最難忘係有一次上大東山影日落，點知落山時迷路，搵到路時已經係夜晚，亦因為呢次經歷，畀我發現大東山有咁壯麗嘅星河。」又要行山又要捱夜，仲要帶齊裝備，影一張星空照片絕不簡單，但他怎樣從中突出自己的作品呢？Will表示：「其他人拍攝嘅星空作品好少加入前景，所以我決定用自己嘅剪影同Cap帽成為Signature，證明張相係我影，不過拍攝最困難嘅地方係要25~30秒曝光時間完全唔准郁。」
Sony邀約搞活動
由於Will玩開facebook，影完星空靚相自自然然在社交網絡製作相簿，估唔到擺上網後迅即被人瘋傳，博得幾千個Like及數百回覆，不少人嘅反應係「用無反機仔都影到咁靚嘅相」？連Will都估唔到，用無反相機拍攝，甚至得到Sony青睞。「當時Sony透過facebook聯絡我，搞咗一個《玩樂手記×銀河小王子》攝影活動，邀請我帶團及Plan行程。由於第一次統籌活動，前後考慮了近一個禮拜才答應對方。結果我們先到西高山影日落，再去盧吉道影夜景，過程中與參加者分享拍攝心得，玩得好開心。」
除咗跟Sony合作，連航空公司及Yahoo!網站都爭相邀約合作，前者請他到想去的地方拍攝美景，而酒店和機票由航空公司全包，航點亦由Will自己選擇；後者的合作形式則屬於遊記性質，把旅遊的所見所聞上載到「Yahoo!旅遊 with GOtrip」與網友分享，足見其作品獲得認同。
旅遊攝影家之夢
廿多歲的Will自言年紀尚輕，強調有夢想就應該去做，希望透過攝影走遍世界各地，他指出：「自己好鍾意去旅行，任何地方都想去，亦因為咁而想做旅遊攝影家，一邊影相一邊寫遊記，性質同Blogger差唔多，而跟不同機構合作算係踏出咗夢想第一步。」除咗旅遊攝影家這夢想外，他還有一個短期目標：「之前睇電視見到有個男仔去完南美，為過一些簡樸生活而到貝澳生活。我亦有探望過佢，令我萌生上大東山住一年的念頭。」現在他正實踐自己的目標，透過各方好友跟爛頭營的業權人洽談相關事宜，有望到大東山尋夢。
大師教路：多玩創意
著名攝影師Felix So表示：「作品加入前景的構圖元素，吸引了觀眾目光，可見Will很用心去拍攝，若然再加點創意，例如參考外國一些作品，用網去抓住月亮或星星，效果會更為突出。」此外，Felix建議初玩星空拍攝時，要留意構圖的水平，避免水平線出現扭曲情況，同時要具備基本天文知識，清楚甚麼時間月出月落，了解天象會更容易影到理想的星空作品。
外國上位例子
提到星空攝影，美國鹽湖城攝影師Royce Bair憑着一輯在布萊斯峽谷國家公園拍攝的銀河相片，廣受影友推崇。這輯相片沒有使用昂貴的攝影器材，只不過是以Canon EOS 5D Mark II單反和15mm F2.8魚眼鏡頭，再加上閃光燈等簡單設備，以增強地形感染力。
網址：roycebair.smugmug.com
撰文：黎子豪
攝影：張群生（部分相片由受訪者提供）