星級陣容 LINE攏粉絲
雖然好多智能手機用家玩咗《LINE》好耐，但一直以來佢都未正式喺香港推出。直至近日，LINE終於登陸香港，推出香港明星同品牌帳號，仲請來韓國人氣組合Super Junior嘅始源，拍攝港版LINE廣告，順便開通埋佢嘅《LINE Play》帳號，畀大家隨時喺手機探吓型到震嘅卡通版始源。
港版LINE登場
或者大家都有印象，台灣版LINE嘅廣告由桂綸鎂擔任主角，今次港版LINE就用上Super Junior嘅始源擔正，講始源同女友分隔兩地，利用《LINE》有趣嘅虛擬貼圖分享日常生活趣事，更由康城廣告節得獎者John Park拍攝，會喺香港連播8個星期。點解會用韓星拍廣告？其實LINE母公司NHN係來自韓國，然後喺日本推出手機應用程式一炮而紅，時至今日，LINE全球1億4,000萬用戶當中，4,500萬用家係來自日本，去日本旅行時見到女仔玩《LINE》唔好覺得奇怪！
《LINE Play》探始源
始源今次唔止拍咗港版廣告，仲特登飛嚟香港撐發布會，Chok晒樣同可愛到震嘅「兔兔」合照！不過呢個活動只有傳媒出席，一般用家又點樣親近始源呢？各位只要喺手機安裝《LINE Play》便可Add到卡通版始源，隨時探佢又得，同佢傾偈兼做家務亦得，粉絲必冧。始源喺虛擬房間入面會「臘」晒頭、着住套黑色西裝，想Add佢的話只要搵「SJ SIWON」就搞掂！除《LINE Play》之外，始源仲會登陸LINE香港帳號，不過截稿時就仲未開通。
首發香港帳號搵Fiona
如想追韓星的話，其實G-Dragon、少女時代嘅LINE帳號早已開通，偶像會定期發布訊息、照片、短片等。而LINE香港帳號啟用，當然唔少得港星代表，打頭陣有薛凱琪（Fiona）同陳奐仁（Hanjin），之後仲會陸續加強陣容，追星族真係有排追！除咗明星帳號外，LINE最強嘅地方係會同當地商戶合作，好似日本方面有無印良品及Lawson等。而香港首個商戶帳號係Circle K便利店，佢哋亦剛推出咗換LINE公仔掛飾活動，「熊大」、「兔兔」同「饅頭」都有得換！
可愛公仔貼圖
LINE公仔貼圖一向好多人鍾意，$15便可買到一輯有趣貼圖。近期更大玩Crossover，如剛推出咗同日本藝術家村上隆合作嘅貼圖，亦有「Gangnam Style」Psy嘅貼圖，推出頭3天更可免費下載！除咗通訊服務外，LINE Games亦相當令人着迷，佢哋差唔多每個月都有新遊戲推出，玩家可透過加入LINE Friends一齊比賽，好似總下載量超過2,000萬嘅《LINE Pop》，以至近期嘅虛擬農場《LINE TinyFarm》等，玩到停唔到手！
撰文：布偉倫
攝影：盧展程
網址：line.naver.jp/zh-hant/