Optimus LII IPS靚芒親民

L7II Dual驚喜筍機

買得入門手機，其實預咗配備渣兼低清芒，勢估唔到今次L7II Dual竟然賣大包。先講規格，新機採用大廠Qualcomm嘅1GHz雙核心處理器，配以768MB RAM，雖然談唔上頂級，不過運行Android 4.1系統絕對冇問題，連開多幾個Apps玩多工處理亦好順暢，表現合格。再講屏幕，不但有4.3吋大，更用上IPS技術，第一眼已經覺得色彩實淨又自然，而且可視角度高，睇片、煲劇效果都極好，個人覺得拍得住高階靚芒機添！

速記翻譯方便

其實新機早於2月舉行嘅MWC 2013展覽亮相，更有L7II及L7II Dual兩個版本，而今次賣街嘅係支援雙卡雙待功能嘅後者。一如其他雙卡機，其SIM 1及SIM 2都支援GSM四頻制式，啱晒成日外遊嘅用家；而且機身前方特設雙卡按鍵，一按可即時切換主卡，長按的話就會彈入「雙智能卡」選項，可以設定數據連接嘅SIM卡，以及SIM卡識別顏色和圖案，相當就手。

電池容量有成2,460mAh，用足一天都冇問題。	SIM卡槽分上下兩層，另外記憶卡支援熱插拔。	備有800萬像素鏡頭，用來影日常照夠晒用。

操控方面，新機採用LG自家介面之餘，更有唔少獨家功能如《QuickMemo》、《QuickTranslator》，前者可以喺任何畫面隨時畫畫、寫字，仲可以儲存畫面Share畀朋友；而後者就可即時翻譯鏡頭對住嘅字句，小記試過英文、中文，甚至韓文、西班牙文都支援到，好玩得嚟都幾實用。

試片區 試播YouTube HQ《Iron Man 3》預告片，靚芒畫質極佳，雙核機能亦冇窒格。	小記即場用《QuickTranslator》玩英譯中，辨識率高、速度快，實用喎！	Optimus L5II 售價及推出日期待定
Optimus L3II Dual 售價及推出日期待定	Optimus F5 LTE 售價及推出日期待定

L7II Dual 規格表

制式：GSM四頻、WCDMA

處理器：1GHz雙核心

記憶體：768MB RAM、4GB ROM、支援microSD

屏幕：4.3吋IPS（480×800解像度）

鏡頭：800萬像素

對外連接：HSDPA 7.2Mbps、Wi-Fi、藍芽3.0

作業系統：Android 4.1

電池容量：2,460mAh

體積：122.2×66.6×9.7mm

重量：127g

同場加映

Optimus L5II變色Home鍵

L5II用番舊有嘅L Series方形靚仔設計，4吋IPS芒、1GHz處理器、512MB RAM屬大路貨色，特別在於Home鍵加入LED燈，來電、鬧鐘及充電期間會分別亮起不同顏色LED燈，易識別又搶眼。

Optimus L3II Dual的骰「掌」握

L3II Dual屬新系列體積最細嘅手機，Size同張八達通差唔多。雖然機仔細細，但支援雙卡雙待功能，中港客啱使到極；而且3.2吋屏幕屬IPS面板，可惜解像度只得240×320，顯示效果一般。規格亦屬入門級，包括1GHz處理器、512MB RAM、300萬像素鏡頭。

Optimus F5 LTE玩味4G

同場備有另一系列嘅Optimus F5 LTE，支援800/1800/2600MHz嘅4G頻譜，香港各大網絡商都適用，上網速度夠快。較特別是機身植入新自家介面，加入QSlide功能，於指定Apps好似瀏覽器、影片播放器等，可以小視窗形式玩多工作業，而且仲可以調校視窗嘅透明度，過癮又實用。另外，新機備有qHD解像度嘅4.3吋IPS芒，亦有2,150mAh電池，整體規格不俗。

撰文：林子聰

攝影：張群生

查詢電話：3543 7777