God of War:Ascension 8神互劈

今集不僅繼續Sell暴力美學，仲加入唔少新元素，譬如可以發動「生命再生」讓時間倒流；而且引入網絡連線模式，可供最多8人互劈，以動作遊戲嚟講算係少見！

新增「生命再生」玩法

《God of War: Ascension》遊戲名稱已點出主要講「戰神」Kratos崛起經過，故其背景推到遊戲三部曲之前嘅世界，可稱為「戰神」前傳。其實前唔前傳都好，Kratos一向都係見人殺人，見神殺神，今次好多系列作嘅招式得以重現，如當Boss快死時主角可使出絕招爬喺佢身上怒斬等。而最特別要數「生命再生」系統，可令時間暫時倒流，回復到場景未被破壞前過關，甚至可停喺某個時間點，讓主角跳上被爆開嘅石塊再跳到指定地點。

多人模式賜予神力

好多大牌動作遊戲只係預單人玩，真係唔多夠喉，而新作終於加入多人模式，仲有4種玩法咁多，可供8人連線一齊玩。較特別係多人戰開始前，唔係揀角色嘅職業同造型，而係要揀所侍奉嘅神祇，好似有主神「宙斯」、戰神「阿瑞斯」、海神「波賽冬」同冥王「哈迪斯」，根據所侍奉嘅神可使出不同技能。如信「宙斯」便可強化魔力，兼擁有雷嘅力量；信「阿瑞斯」會提升攻擊能力及得到炎嘅力量。如覺得招式唔啱用時，仲可以隨時過檔添！

獲「神的祝福」升級

雖然多人戰嘅玩法幾大路，但都加入咗有趣元素。喺計算擊倒對手次數嘅「Deathmatch」玩法入面，地圖不時會掉落諸神副武器，擸咗嚟用的話便可提升戰鬥力；另要善用地圖陷阱，將對方踢到有刺針嘅牆壁，或者啟動地圖機關，都可得到事半功倍效果。「Deathmatch」既有各自為政玩法，亦提供兩隊、每隊4個玩家嘅「Team Favor of The Gods」，另有傳統嘅「Capture the Flag」搶旗玩法。此外，玩家可透過不斷戰鬥贏取「神的祝福」，藉此強化能力值和升級武器，玩法靈活。

DETAILS

類型：動作

開發：SCE Santa Monica

平台：PS3

推出日期：3月12日

售價：$388

查詢電話：2341 2356

撰文：布偉倫