Jill Stuart 公主Phone 盛裝加萌

香港少女大多有鋪「公主」癮，唔係指性格，而係衣着打扮，公主袖連身裙、喱士花邊加埋大小蝴蝶結，感覺萌到爆；但若然出街時拎部iPhone出嚟，就乜嘢Mood都冇晒。幸好日本廠商總係明白少女心事，DoCoMo早前與潮牌Jill Stuart合作炮製出F-03E公主Phone，粉紅機身、別注內容加上精緻防塵塞，「卡娃兒」滿瀉！

售價：$4,980

渾圓華麗造型

Jill Stuart幾近與公主裝扮畫上等號，產品每每讓女士們回復童真。呢部從水路到港嘅F-03E貫徹品牌理念，除了四邊渾圓、僅厚10.6mm的微彎機身Fit晒女仔手形外，還用上招牌Blush Pink主色，在唇膏造型的Stylus配合下，單係外觀已經攞滿分。其他Detail位亦落足心思，例如鏡頭旁鑲有Bling Bling閃石，機頂閃燈具備23種閃爍效果；最正係跟機附送高踭鞋、蝴蝶結及香水樽3款造型嘅防塵塞，喺街絕對買唔到，擁躉們豈能錯過。

妝容直接套入

外觀引死人，內涵同樣吸引。小記甫開機已可見到以香水樽作Icon的解鎖畫面，再入去是Jill姐親筆簽名嘅Wallpaper，若想了解品牌旗下化妝品資料，更可透過《Jill Stuart Beauty》App進入官方網站，睇吓日本售價及限定商品，方便用家格價再託人購買。另外，唔係每位女士都曉得化妝影相，故手機特設《DeCoPic》拍攝程式，可替相中人美白、美瞳兼瘦面，亦可直接套用「Nature」或「Girly-glam」兩種效果，淡、濃妝一按即成，勁方便！

使用microSD卡及microSIM卡，可惜要拆電先換到。

雖然鏡頭得800萬像素，但旁邊有靚靚閃石點綴。

雙核運算規格

雖然定位係公主機，但硬件絕不失禮，1.5GHz雙核心處理器、1GB RAM加Android 4.0系統，小記實測所見，無論撥頁、上網或打機都相當順暢，不會被同級Smartphone比下去。唯一要彈嘅係鏡頭只得800萬像素，以日系機來說稍為落後。幸好有其他功能補番數，例如防水標準達到IPX5/8級數，可在1.5米水深下運作30分鐘；同時提供計步器及濕度計，幫女士計算卡路里消耗量和環境濕度，減肥、敷Mask都幫到手。

Stylus用了唇膏造型，並可綁於機底。	防塵塞備有高踭鞋、蝴蝶結及香水樽3個造型，靚到唔捨得用！	耳機成粒朱古力豆咁款，最正係送埋個絲質袋仔畀大家。
附送橫向充電座，方便邊充電邊上網和睇片。