財運亨通 有玄機

招財方位睇清楚

想喺蛇年財運暢旺，數金牛都數到手軟嘅話，只需要知道今年財位坐落喺邊度就得。吳師傅指今年東北方為正財位，而西北方為偏財位。如果屋企嘅露台同大門坐落喺呢兩個方位嘅話，就可以盡吸今年正或偏財。發覺屋企大門唔係開正呢兩個方位？又唔使咁煩惱嘅，皆因可以喺屋企擺放個旺財擺設嚟招財運，財源自然滾滾而來。

旺財擺設不可少

有人問喺屋企擺放招財擺設會唔會好麻煩？師傅表示其實好容易，只要知道當中重點就得。將唔同嘅擺設放喺東北同西北兩個方位，自然可以食到財運。想正財同橫財兩得意嘅話，大家就要記住喇！

想有橫財運，龍紋裝飾又點少得。

辦公枱頭擺個發財陣，財運自然亨通。

正財東北方：擺放有虎或牛嘅裝飾品，不論係掛畫、花瓶、手工藝品都得。此外，大家亦可選擇擺放水種植物或流水裝置，例如水機、水流滾動式香薰燈亦可，正財自然得心應手。

卡其色嘅衣服可提升正財運。 波點襪既可愛又可增加橫財運。	甜如湯圓既應節，又可催谷正財。	辣味食物可令偏財暢旺。
綠色水種植物具有招納正財作用。

偏財西北方：擺放有龍或馬嘅裝飾品。如果想效果更好嘅話，不妨擺放一個圓形玻璃盤，上面放上圓形嘅琉璃石、硬幣、石春或波子，自製一個招財進寶陣，橫財即刻源源不絕湧埋嚟。

另外，由於蛇年中宮係災位關係，因此大家記得千祈咪經常坐喺屋企嘅正中央，或可擺個圓形枱燈或圓枱嚟化煞。

化解破財妙法

雖然話有計食正財運，唔使憂啲錢唔到位，但若然支出大增嘅話，即係搵到、賺到到頭嚟只係一場空，根本冇錢落過袋，唔想咁樣就要認住蛇年破財同病符位。吳師傅指出，今年正西係破財位，而病符位則坐落西南。依家獻上化解之法，等大家既可袋袋平安，又可以身體健康。

化解正西破財：擺放紅色嘅物品或裝飾物，例如紅色嘅花、紅色地氈或於大門兩側掛上兩串紅色假仗。

化解西南病符：掛白玉或金色葫蘆，或擺設鍾馗畫像亦可化解病符星入侵。

辦公枱上運財陣

家陣嘅打工仔，每日幾乎有一半嘅時間喺公司，因此既然屋企擺得招財裝飾嘅話，公司嘅辦公枱頭又點可以冇呢？不論係打工仔定係老闆，只需要辦公枱頭嘅左上、前方同右上方三個地方，擺放綠色植物、紫水晶、座枱鐘等嘅物品，就能夠招納財氣。究竟應該點樣擺，我哋睇吓下面嘅方法就得。

左上方：擺放綠色植物，如萬年青、富貴竹；或文昌塔，即係東京鐵塔、艾菲爾鐵塔呢類嘅尖塔形擺設。

正前方：放置紫水晶，不但能夠吸納正財及偏財運，更有有助提升桃花及人緣運，對於經常見客同做生意嘅人士就啱晒。

右上方：擺放圓形嘅金屬物品，例如金屬筆筒、金屬水杯、金屬雜物盒等。如果右上方係西南病符位嘅話，則最好擺個座枱鐘，就可以化解病符星入侵。

服裝襯色至夠旺

常言道人靠衣裝，着起靚衫自然格外醒神，若然可以順便提升埋財運嘅話，當然係一舉兩得！既然係咁，唔知蛇年應該着乜嘢服裝，至可以盡吸財氣呢？唔同嘅顏色對正財同偏財具有唔同嘅作用，大家不妨睇吓應該着乜嘢顏色嘅服裝，可以將財運進一步提升。

正財：泥黃、卡其色呢兩隻色就至啱。

偏財：白、金、銀，最好配合波點圖案嘅衫、褲同襪。

此外，吳師傅又提議單身男女想拍拖，應着黑同灰色嘅服裝。至於拖友如果想喺蛇年步入教堂嘅話，便多着紫色嘅服裝。想利文昌嘅話，則應着綠色、間條花紋或樹葉圖案嘅服裝。

食物亦可招財運

食得是福，有福氣自然財運到，蛇年應該食乜嘢食物，可以有利財運呢？想提升正財運嘅話，應該多食甜味食物，而想提升偏財運嘅話，則應多食辣味食物，自然有助提升運氣。不過順帶提醒大家一句，雖然呢兩種味道嘅食物有助提升財運，但食得有節制同樣相當重要o架！

撰文：林國豪　

攝影：昌

模特兒：Cobi、Teresa、Melvin@Talent100

鳴謝：風水玄學專家吳佩孚